Adil Qeybulla: "İnsan orqanizminə zərər verən qidalar nə televiziya kanalları, nə də iaşə obyektlərində reklam olunmalıdır"
Azərbaycanda sağlamlıq üçün təhlükə törədən məhsulların reklamının qadağan olunması, yeyinti məhsullarının reklamı ilə bağlı prosedurun dəyişdirilməsi təklif edilir.
Səhiyyə Nazirliyinin Sağlam həyat tərzi üzrə milli koordinatoru Azad Hacıyev media nümayəndələrinə açıqlamasında bildirib ki, hansısa məhsul insanın sağlamlığı üçün təhlükə yaradırsa, onun ölkəyə gətirilməsinə məhdudiyyət qoyulmalı, reklamı da qadağan edilməlidir.
A.Hacıyevin sözlərinə görə, bəzi ölkələrdə genetik modifikasiya olunmuş məhsullardan istifadə edilir. Azərbaycanın qanunvericiliyinə görə, genetik modifikasiya olunmuş məhsulların idxalı və ölkədə istehsalı artıq qadağandır.
Məlumat üçün bildirək ki, Rusiya Səhiyyə Nazirliyi insan sağlamlığı üçün zərərli olan kolbasa, çipsi, şokolad, qazlı su kimi məhsulların reklamının məhdudlaşdırılmasını təklif edib.
Azərbaycan Reklamçılar İttifaqının prezidenti Hacıəmi Atakişiyevin sözlərinə görə, təhlükəli məhsulların bazara yol açmaması üçün Azərbaycanda da yeyinti məhsullarının reklamı dünya ölkələrində olduğu kimi aparılmalıdır: "Yeyinti məhsullarının reklam olunması üçün Səhiyyə Nazirliyi, İqtisadiyyat Nazirliyi və digər müvafiq qurumlar həmin məhsulun insan sağlamlığına təhlükəsiz olması barədə rəy verməlidir. Yalnız bundan sonra yeyinti məhsullarının reklamına icazə verilməli, onun reklam işi təşkil olunmalıdır".
Professor, tibbi ekspert Adil Qeybulla bizimlə söhbətində bildirdi ki, certifikatı olmayan məhsulların ölkəyə girişinə qadağa qoyulmalıdır. Bu tip məhsulların harda gəldi reklam olunması düzgün deyil. Elə məhsullar var ki, onların reklamı ümumiyyətlə qadağan olunmalıdır. Bunlardan şokolad, saqqız, tum, qazlı su, kolbasa və digərlərini misal göstərmək olar. Geni modifikasiya olunmuş məhsulların reklamı qadağan olunmalıdır".
Onun sözlərinə görə, insan orqanizminə zərər verən qidalar nə televiziya kanalları, nə də iaşə obyektlərində reklam olunmalıdır: "Uşaq yolda anası ilə gedərkən lövhədə şokolad və ya "fast-food" qidasının reklamını görəcək və onu istəyəcək. Bu səbəbdən həmin qidaların reklamı tam olaraq yığışdırılmalıdır".
Günel CƏLİLOVA
