"Bu Peşə Liseyində onlara təkcə hər hansı bir sənətin sirlərini öyrətmirlər. Həm də insanlara sevgini, sayğını, mərhəməti və şəfqəti öyrədirlər". Tədbirdən öncə lisey rəhbərliyinə ünvanladığım suallardan birinin cavabı belə idi...
Onu da öyrəndim ki, leseyin öyrənci bərbərləri uşaq evlərinə gedərək ata-ana himayəsindən, nəvazişindən uzaq olan körpələrin, yeniyetmələrin saçlarını kəsməklə həm təcrübələrini artırır, həm də savab iş iş görürlər...
Adətən, çoxumuzda belə bir fikir formalaşıb ki, təhsildə göstəricisi və davamiyyəti zəif olan şagirdləri məcburi də olsa peşə liseylərinə yönləndirmək lazımdır. Fikirləşmişik ki, bəlkə bu kimi üsullarla şagirdlərdə, yeniyetmələrdə təhsilə, peşəyə maraq oyada bilərik. Ancaq bu metodlar həmişə özünü doğrultmur. Tələbimizlə gözləntimiz arasında elə bir uçurum yaranır ki, onu sonralar heç nə ilə bərpa edə bilmirik...
Dəhlizdə gənclik enerjisi ilə, sözün əsl mənasında, "qaynayan" "dəliqanlı" şagirdləri görəndə bir anlıq məktəb illərinə qayıtdım. Maraq dolu baxışları ilə məni süzənlərin üzündən bu fikri aydınca oxuyurdum: "Yəqin ki, bura birinci dəfədir gəlib". "Cənab mayor, siz də tədbirə gəlmisiniz" sualına xəyaldan ayıldım. "Bəli, tədbirə gəlmişəm", - dedim.
Düzü, uşaqların mənə rütbəmi görüb müraciət etmələri də diqqətimi cəlb etdi. Bəli, "Görünən, dağa nə bələdçi". Demək ki, burada vətənpərvərlik, vətənsevərlik dərslərini də müəllimlər tələbələrə aşılayır, həm də onlara ilkin hərbi hazırlıqdan az da olsa nəyisə öyrətməyə çalışırlar...
Əvvəlcə liseyin direktoru Fikrət Nəbiyev qonaqları şagirdlərə təqdim etdi. Dedi ki, burada iştirak edən polis əməkdaşlarının əksəriyyətini şagirdlərimiz tanıyır. Ancaq qonaqların arasında elələri var ki, onların liseyimiz haqqında məlumatı yoxdur. İstəyirəm ki, qısa bir arayış verim...
Və öyrəndik ki, bu təhsil ocağı 1971-ci ildə respublikada radio-elektronika sənayesi üçün fəhlə kadrlarının hazırlanması məqsədilə Bakı Radio Zavodunun nəzdində açılıb. Məktəb 1985-ci ildə 960 yerlik bu kompleksə köçürülüb. 1996-cı ildə ona 5 nömrəli Bakı Peşə Liseyi statusu verilib. Liseydə 2013-cü ildən yenidənqurma işləri başlayıb, 41 kabinet yaradılıb, 8 tədris emalatxanası var. Liseydə turizm sektoruna aid ixtisasların hazırlanmasına da böyük əhəmiyyət verilir.
Sonra Xətai RPİ-nin rəisi, polis polkovniki Muradəli Babayev çıxış edərək dedi ki, bu gün təhsilimizin inkişafı naminə ölkə rəhbərliyi tərəfindən atılan addımlar öz bəhrəsini verməkdədir. Xüsusən də peşə liseylərinin yenidən qurulması, müasir tələblərə cavab verən avadanlıqların alınması, gənc nəslin müxtəlif peşələrə yiyələnmələri üçün nəzəri və təcrübi biliklərin yüksək səviyyədə aşılanması gənclərə olan inamın ifadəsidir. Savadlı, bacarıqlı gəncliyin yetişməsində mühüm dövlət qurumlarından biri kimi bu gün Azərbaycan Polisi də üzərinə düşən vəzifəni layiqincə icra edir. Elə müxtəlif mövzularda keçirilən maarifləndirici tədbirlər də buna sübutdur.
Polis əməkdaşlarının narkomanaiya ilə ciddi mübarizəsi də göz önündədir. M.Babayev həmçinin qeyd etdi ki, RPİ tərəfindən ötən il 25 kiloqramdan çox narkotik vasitə qanunsuz dövriyyədən çıxarılıb, amma əsas vəzifə təkcə cinayətlərin açılması, onu törədənlərin ifşası deyil, həm də bu bəlanın qurbanlarının sayını azaltmaqdır.
Respublika Narkoloji Mərkəzin şöbə müdiri Afət Məmmədova mövcud durumla bağlı narahatlığını dilə gətirdi. O dedi ki, dünyada narkomaniyadan 250 milyondan çox insan həyatını dəyişib və bu sağalmaz xəstəlikdən ölkəmizdə də ölənlərin sayı az deyil. Fiziki və psixoloji asılılıq yaradan narkomaniyanın qurbanları arasında qadınların olması isə təəssüf doğurur.
Şəxsi heyətlə iş üzrə rəis köməkçisi, polis polkovnik-leytenantı İdris Məhərrəmov isə son zamanlar dünyanı silkələyən dini radikalizmin fəsadları haqqında geniş məruzə ilə çıxış etdi.
Tədbirdə İdarənin Veteranlar Şurasının üzvləri, RPİ Yetkinlik yaşına çatmayanlarla profilaktik işin təşkili bölməsinin inspektoru, polis kapitanı Günel Həsənova, Polis Akademiyasının idarədə təcrübə keçən bir neçə kursantı və xidmətə yeni qəbul olunmuş polisə ictimai dəstəyin üzvləri iştirak edirdi.
Hafiz Təmirov, polis mayoru
