Leyla Zülfüqarlı: "Gənclər arasında piylənmənin əsas səbəbi qeyri-düzgün qidalanmadır"
Piylənmə artıq qlobal problemə çevrilib. Tək Azərbaycan yox, inkişaf etmiş ölkələrin əhalisi belə piylənmədən əziyyət çəkir. Ümumdünya Səhiyyə Təşkilatının məlumatına görə, ildə 3.4 milyon adam piylənmə və artıq çəkidən dünyasını dəyişir.
Ümumdünya Piylənmə Federasiyası bildirir ki, piylənmə uşaqların və gənclərin sağlamlığına, təhsildə uğur qazanmasına, həyat tərzinə çox böyük neqativ təsir etdiyi halda, bu problemə qarşı ciddi tədbir görülmür. Piylənmə Federasiyasından Tim Lobstein problemlə yalnız inkişaf etmiş ölkələrin mübarizəyə başladıqlarını bildirib. Halbuki, piylənmənin artması həm varlı, həm də kasıb ölkələrdə müşahidə olunmaqdadır.
Azərbaycanda məlum problem yaşanır. Açıqlanan statistik rəqəmlərdə hər il artım müşahidə olunur. Dövlət Statistika Komitəsinin məlumatına əsasən, Azərbaycanda 4401 nəfər piylənmə diaqnozu ilə qeydiyyatdadır. Müalicə-profilaktika müəssisələrində piylənmə diaqnozu ilə qeydiyyatda olan kişilərin sayı 1870, qadınların sayı isə 2531 nəfərdir.
Piylənmədən əziyyət çəkənlər arasında 18 yaşadək olanların sayı 1327 nəfərdir. Bu yaşda piylənmədən əziyyət çəkənlər arasında oğlanlar üstünlük təşkil edir. Belə ki, qeydiyyatda olanlardan 724-ü oğlan, 603-ü isə qızdır.
Gənclər arasında piylənmənin sürətlə artmasına fikir bildirən dietoloq Leyla Zülfüqarlı "Bakı-Xəbər"ə açıqlamasında qeyd etdi ki, piylənmə istənilən yaş dövründə olan insanlarda müşahidə edilir: "Əsasən kiçik yaşlı, məktəbli və yeniyetmələrdə artım daha çox qeydə alınır. Bu halı bizə müraciət edən xəstələr arasında da müşahidə edirik. Oğlan və qız uşaqlarının cinsi yetişkənlik dövrünə girə bilməməsinin səbəbi həddindən artıq piylənmədir".
Dieotoloq gənclər arasında piylənmənin artması səbəbinin qeyri-düzgün qidalanma olduğunu dilə gətirdi. Onun sözlərinə görə, valideynlərin uşaqlara diqqətinin tam olmaması da problemin yaranmasına səbəb olur: "Azyaşlı və ya məktəbli uşaq valideynin istəyilə hərəkət edir. Valideyn uşağa qidalanmaq üçün nə verirsə, o da onu qəbul edir. Uşaqlar bayramlarda mütəmadi olaraq konfet, şokolad, müxtəlif növ şirniyyat əvəzinə meyvə və meyvə qurusu görsə, onda piylənmə az müşahidə olunar".
Həmsöhbətimizin sözlərinə görə, qidalanmanın düzgün proqramlaşdırılmaması piylənməyə səbəb olur.
Günel CƏLİLOVA
