"Naxçıvanda yas mərasimlərində israfçılığa yol verilməsi yığışdırılıb"
Azərbaycan xalqı hər zaman adət-ənənələri, milli-mənəvi dəyərləri ilə seçilən xalq olub. Bu dəyərlər əsrlərin sınağından üzüağ çıxaraq müasir dövrümüzədək yaşadığımız həyat tərzinin bir hissəsinə çevrilib. Dəyərlərimizi yaşadan isə bizə böyüklərimizdən miras qalmış əxlaqımız, soykökümüzə bağlılığımız və bu ənənələrimizin dini dəyərlərimizlə bir-birini tamamlamasıdır.
Ancaq etiraf edək ki, bəzən dəyərlərimizi mənəvi aşınmalara məruz qoyan da bizik. Bəllidir ki, son illər dəfn-yas mərasimi ilə bağlı müəyyən problemlər yaşanırdı. Qəbirlərin təm-taraqlı formada hazırlanması heç kimə sirr deyil.
Artıq bu istiqamətdə müəyyən işlər görülür. Naxçıvan Muxtar Respublikasının bütün bölgələrindəki qəbiristanlıqlarda məzarların dəmir çəpərləri vəfat edənlərin yaxınları tərəfindən sökülürək götürülür, ərazilərdə təmizlik və səliqə-sahman yaradılır.
Naxçıvan Muxtar Respublikasının Dini Qurumlarla İş üzrə İdarəsinin rəisi Vüqar Babayev Naxcivantv.az-a açıqlamasında deyib ki, Naxçıvan Muxtar Respublikası Nazirlər Kabinetinin 2007-ci il 27 noyabr tarixli Qərarına əsasən, mövcud olan məzarlıqlarda dəfn zamanı qəbirlərin milli-dini dəyərlərin tələblərinə və qaydalara uyğun ölçüdə salınması zəruridir: "Hər bir qəbir üçün ölçü qaydaları müəyyən olunub. Qaydalara əsasən, hər bir məzarın eni 1 metr 40 santimetr, uzunluğu isə 2 metr 20 santimetr olaraq müəyyənləşdirilib".
Naxçıvan Muxtar Respublikasında dəfn-yas qaydalarına əhalinin riayət etməsi hər kəs tərəfindən xoş qarşılanır.
İlahiyyatçı Seyid Camal Əzimbəyli "Bakı-Xəbər"ə açıqlamasında qeyd etdi ki, Azərbaycanda qəbir yerləri ilə bağlı ciddi problem var. Bununla bağlı aidiyyəti qurumlar maarifləndirmə işi aparsa da, təəssüf ki, insanlar öz istəklərindən əl çəkmək istəmir. Ancaq Naxçıvanda vəziyyət digər bölgələrə nisbətən yaxşıdır: "Naxçıvanda yas mərasimlərində israfçılığa yol verilməsi yığışdırılıb. Artıq həmin bölgənin yas məclisərində israfçılıq baş vermir. İsrafın qarşısı alınıb. Bu nümunə digər bölgələrdə də tətbiq olunmalıdır. Belə bir qayda vəfat etmiş şəxsin yaxını tərəfindən tətbiq olunsa, həm Allah rızasına, həm də dövlətin milli maraqlarına uyğun gələr".
Naxçıvanda qəbiristanlıqlarda məzarların dəmir çəpərlərinin vəfat etmiş şəxsin yaxınları tərəfindən sökülməsini S.C.Əzimbəyli müsbət dəyərləndirdi. Onun fikrincə, belə bir iş vəfat etmiş şəxsin yaxınlarının xeyrinə olan mütərəqqi bir addımdır: "Həmin bölgənin məzar yerlərində səliqə-sahman yaradılır. Naxçıvan əhalisinin özlərinin belə bir təşəbbüs göstərməsi sevindiricidir. İnsanlar doğmalarının məzarlarını kol-kosdan təmizləyəcək. Orada olan bütün qəbirlər eyni ölçüdə olacaq. Bəllidir ki, qəbirlərin və qəbirüstü abidələrin müxtəlif formalarda, iri həcmdə olması, demək olar ki, əksər bölgələrdə dəbdir. Bütün qəbirlərin eyni, standart ölçüdə olması təqdirəlayiqdir. Zənnimcə, analoji addım ölkənin bütün bölgələrində tətbiq olunmalıdır".
Günel CƏLİLOVA
