Adil Qeybulla: "Bazar iqtisadiyyatı şəraitində bu cür yanaşma ilə ölkədə lazımi dərmanların mövcudluğunu təmin etmək mümkün deyil"
Mediada yayılan məlumata əsasən, artıq Bakıda və bölgələrdə satılan dərmanların qiyməti birbaşa dolların məzənnəsindən asılı olacaq. Tarif Şurası dərmanların qiymətlərinin tənzimlənməsi barədə yeni qaydaları təsdiq edib.
Həmin qaydalara görə, dərmanların qiymətini Tarif Şurası birbaşa müəyyən etməyəcək və o, topdansatış şirkətlərinin aldığı qiymətə xüsusi əlavə edilməklə satılacaq. Topdansatış şirkəti dərmanın üstünə alış qiymətinin 20 faizindən artıq vəsait qoya bilməyəcək. Özü də ticarət marjası alış qiyməti artdıqca azalacaq.
Topdansatış şirkəti 5-20 manat qiymətin üzərinə 17 faiz, 20-50 manat qiymətin üzərinə 13 %, 50-100 manat arasında dəyişdikdə isə 7 faiz əlavə edə bilər. 100 manatdan sonra isə topdansatış şirkəti yalnız 3 faiz əlavə edə bilər. Aptek (pərakəndəsatış) qiymətlərində ticarət marjası nisbətən yüksəkdir və 50 manata qədər dərmanlarda 20 faiz təşkil edir, 50-100 manat arasında 13 faiz, 100 manatdan yuxarı isə 11 faiz olacaq.
Dərmanların qiymətinin dolların məzənnəsinə uyğun dəyişəcəyinə dair fikir bildirən professor, həkim-ekspert Adil Qeybulla bizimlə söhbətində bildirdi ki, ölkənin dərmanla təminatında bu cür yanaşma uğur gətirməyəcək: "Bazar iqtisadiyyatı şəraitində bu cür yanaşma ilə ölkədə lazımi dərmanların mövcudluğunu təmin etmək mümkün deyil. Əslində, hökumət bazara müdaxilə etməməli idi. Müdaxilə etdilər, dərmanlar yoxa çıxdı. Bu da müdaxilədir və nəticəsi yaxşı olmayacaq".
Onun sözlərinə görə, bütün məsuliyyəti firmaların üzərinə atmaq doğru deyil: "Dövlət aztəminatlıların vəziyyətini düşünürsə, bunun qayğısına özü qalmalıdır. Bazarda əlverişli qiymətə dərmanların olması üçünsə inhisarçılıq ləğv edilməli və kiçik firmaların da işləməsinə şərait yaradılmalıdır. Onda bazarda müxtəlif çeşiddə istənilən dərman tapmaq mümkün olacaq. Bunun üçün həm də ümumi dərman reyestri yaradılmalıdır ki, həkimlər xəstəyə ucuz dərman yaza bilsin".
Tarif Şurası Katibliyindən mediaya bildirilib ki, dərman preparatlarının qiymətlərinin tənzimlənməsi ilə bağlı qanunvericilikdə heç bir dəyişiklik yoxdur. Şura bir daha xatırladır ki, dərman vasitələrinin qiymətləri "Dövlət qeydiyyatına alınmış dərman vasitələrinin qiymətlərinin tənzimlənməsi və həmin qiymətlərə nəzarətin həyata keçirilməsi Qaydası"nın təsdiq edilməsi haqqında Azərbaycan Respublikası Nazirlər Kabinetinin 2015-ci il 3 iyun tarixli Qərarına və Tarif (qiymət) Şurasının 2015-ci il 21 iyul tarixli Qərarı ilə təsdiq edilmiş "Dərman vasitələrinin qiymətlərinin hesablanması üsullarına dair Təlimat"a uyğun olaraq həyata keçirilir. Nazirlər Kabineti tərəfindən təsdiq olunan qaydada öz əksini tapan müvafiq əlavələr də nəzərə alınmaqla, Tarif (qiymət) Şurası tərəfindən dərman vasitələrinin topdan və pərakəndə satış qiymətləri təsdiq edilir və bütün ölkə üzrə vahid qiymətlər tətbiq olunur. Dərman vasitələrinin topdan və pərakəndə satış qiymətlərində dəyişiklik yalnız Tarif (qiymət) Şurasının qərarı ilə həyata keçirilə bilər.
Günel CƏLİLOVA
