Adil Qeybulla: "Filtrlərdən istifadə etdikdən sonra bu qurğularda bakteriyalar yığılır"
Əhaliyə verilən içməli suyun "keyfiyyəti" çoxlarına məlumdur, xlor iyli və ərpli... Hər dəfə kranları açıb təmizləyəndə kranın ağzındakı setkaya xırda daşlar, lilin yığıldığını istənilən şəxs görə bilər.
Sağlamlığına diqqət edən insanlar ya mağazalarda satılan qablaşdırılmış su alır, ya da sutəmizləyici filtrlərdən istifadə edir. Suların qaynadıldıqda ərp bağlaması isə filtrlərin keyfiyyətsizliyindən xəbər verir.
Azərbaycanda müxtəlif firmalara məxsus filtrlər satılır. Firma nümayəndələri məhsullarını mənzillərdə reklam etməklə də onların satışını həyata keçirir.
Qeyd etdiyimiz kimi, bu gün bazarda müxtəlif adda təmizləyici filtrlər var. Onların bəzisi original, bir qismi isə saxtadır.
Süni sutəmizləyici aparatların insan sağlamlığına nə kimi təsirləri ola bilər?
Professor, tibbi ekspert Adil Qeybulla bizimlə söhbətində bildirdi ki, süni su filtrlərindən süzülən su insan sağlamlığına ziyandır: "Şirkətlər mənzilləri gəzərək eksperiment aparır, öz məhsullarını reklam edir və baha qiymətə əhaliyə satır. Əslində, o filtrlərdən keçən su ölü sudur, heç bir faydası olmur. Məsələ burasındadır ki, filtrlərdən istifadə etdikdən sonra bu qurğularda bakteriyalar yığılır. Filtrlərin içi xüsusi avadanlıq vasitəsilə yuyulmadığına görə bura mikroorqanizmlərin mənbəyinə çevrilir. Bu da sonradan insanlarda müxtəlif xəstəliklərin yaranmasına səbəb ola bilər.
Ölkəyə gətirilən süni sutəmizləyici aparatların əksəriyyəti Çin istehsalıdır. Bu filtrlər, demək olar ki, dünya və Avropa standartlarına cavab vermir. Həmin sutəmizləyici aparatlar aşağı keyfiyyətli materialdan hazırlanır. Xaricdən gətirilən sintetik tərkibli filtrlər geniş yayılıb. Məlumat üçün bildirim ki, həmin məhsulların əksəriyyəti Avropada və bəzi MDB dövlətlərində bazara buraxılmır. O tip filtrlərin müəyyən müddətdən sonra dəyişilməsi də vacibdir". Günel CƏLİLOVA
