Eyyub Hüseynov: "Saxta ətirlərin satışdan çıxarılmasında ilk öncə istehlakçılar maraqlı olmalıdır"
Aygün İsmayılova: "Saxta ətirlər dəri ilə təmasda olduqda allergik reaksiya verir"
Hər bir xanım öz zövqünə görə ətir alır və təbii ki, ətirlərin qiyməti keyfiyyətindən asılı olaraq dəyişir. Amma burada maraq doğuran məqam odur ki, ətirləri alarkən onun saxta olub-olmadığını necə müəyyən etməyi bilməkdir. Bəziləri düşünür ki, ətir bahadırsa, onda iyi qalıcıdır və saxta deyil.
Bu gün parfümeriya mağazalarında müxtəlif firmaların istehsal etdiyi məşhur brend ətirlər satılır. Ancaq aparılan araşdırmalar nəticəsində məlum olub ki, bəzi mağazalarda original ətirlə yanaşı, saxtası da satılır.
Saxta ətirlərin satışının qarşısının alınması istiqamətində zaman-zaman müəyyən işlər görülüb.
Azad İstehlakçılar Birliyinin sədri Eyyub Hüseynov "Bakı-Xəbər"ə açıqlamasında qeyd etdi ki, parfümeriya məhsullarının etiketində onun istehsal tarixi qeyd olunmalıdır. Təəssüf ki, kosmetika məhsullarının əksəriyyətində buraxılma tarixi qeyd olunmayıb: "Bu gün şəhərin istənilən ərazisində saxta parfümlərin rahat şəkildə satışını müşahidə etmək olar. Metro çıxışlarında, əhalinin sıx toplaşdığı məkanlarda və ya parfümeriya dükanlarında saxta ətirlər rahat şəkildə satılır".
Həmsöhbətimizin sözlərinə görə, saxta kosmetik məhsullar insan səhhətinə zərərlidir: "Nəzərə almaq lazımdır ki, parfümeriya məhsulları birbaşa dəri ilə təmasda olur. Saxta ətirlər isə insanda allergiya, boğaz və baş ağrısına səbəb olur".
E.Hüseynov onu da əlavə etdi ki, bu gün ən brend parfümeriya mağazalarında istənilən növ saxta ətirləri almaq olar: "Bu tip ətirlərin satışdan çıxarılmasında ilk öncə istehlakçılar maraqlı olmalıdır. Onlar dükandan ətir alarkən onun son buraxılma tarixi və sertifikatını tələb etməlidir. Məhsulun sertifikatı yoxdursa, alıcı o parfümeriyanı almasın".
Kosmetoloq Aygün İsmayılova isə bu məsələdə əhalini ehtiyatlı olmağa çağırır. Onun sözlərinə görə, saxta ətirlər dəri ilə təmasda olduqda allergik reaksiya verir. Müxtəlif dermotozlar, qaşınmalar dərinin quruması problemlərini əmələ gətirir. Bundan başqa, piqment ləkələr əmələ gətirir.
Sonda onu da qeyd edək ki, İnzibati Xətalar Məcəlləsində saxta ətirlərin satışı ilə məşğul olan şəxslərin 1500 manatdan 3000 manatadək cərimələnməsi göstərilsə də, təəssüf ki, bazarda yenə də saxta ətriyyatlara rast gəlmək mümkündür.
Günel CƏLİLOVA
