Azər Allahverənov: "Bu zaman uşaqların həyatı daha effektiv şəkildə qorunar"
Azərbaycanda avtomobildə gedərkən çoxlarının azyaşlı uşaqların daşınması qaydalarını bilərəkdən və ya bilməyərəkdən pozduğunun şahidi oluruq. Bu məsələdə istər sürücülər, istərsə də valideynlər az qala kütləvi səhlənkarlıq nümayiş etdirir. Amma çoxları anlamır ki, bununla körpələrin həyatını təhlükə altına atmış olurlar. Ancaq görünən odur ki, bu istiqamətdə tələblər sərtləşdirilir.
Bakı Şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədov mətbuata açıqlamasında bildirib ki, "Yol hərəkəti haqqında" Qanunda qeyd edilir ki, 12 yaşadək uşaqlar xüsusi oturacaqda oturmalıdır: "Bu tələb pozulursa, bu zaman avtomobil saxlanır və sürücüyə inzibati qaydada protokol tərtib edilir. Bu zaman sürücüyə 3 bal yazılır və o, 60 manat cərimə ödəməli olacaq. Qeyd etməliyəm ki, arxa oturacaqda xüsusi oturacaqsız 12 yaşadək uşaq oturursa, burada inzibati məsuliyyət nəzərdə tutulmasa da, yolda hər an baş verə biləcək hadisənin ağırlığını nəzərə almaq lazımdır".
V.Əsədov onu da qeyd edib ki, Avropa qanunlarına, müasir tələblərə, konvensiya tələblərinə nəzər salanda bu cür tələbləri görmək olur: "Biz Avropaya inteqrasiya ediriksə, bilməliyik ki, Avropa ölkələrində arxa oturacaqlarda da uşaqlar üçün xüsusi oturacaqlardan istifadə edirlər. Niyə? Çünki sürücü şüurlu şəkildə başa düşür ki, arxa oturacağı uşaqlar üçün təhlükəsizlik oturacaqları ilə təmin etməlidir. Mən də belə tövsiyə edirəm ki, inzibati cəzanın, ətrafda polis əməkdaşının olub-olmamasına baxmayaraq, arxa oturacaqda uşaqlar üçün mütləq oturacaq olmalıdır. Ən azından, sürücü bununla övladlarının təhlükəsizliyini qoruyur".
Maraqlıdır, bəs ekspertlər buna necə yanaşır? Sözügedən məsələni dəyərləndirən ekspert Azər Allahverənovun fikrincə, prinsipcə, bu doğru yanaşmadır: "Cərimələrə baxmayaraq, bu qaydalar yenə də az qala kütləvi şəkildə pozulur. Çox zaman şahidi oluruq ki, kimsə qabaqda oturub, uşağı da qucağında otuzdurub. Bu yolverilməz haldır. Xüsusi oturacaqların bir neçə növü var. Onlar elə bir qurğudur ki, təhlükəsizlik kəməri ilə avtomobilin oturacağına bərkidilə bilir, uşaq da onun içində oturanda təhlükəsizliyi daha çox qorunur, onun fiziki xəsarət almaq ehtimalı minimuma enir. 12 yaşadək uşaqların arxa oturacaqlarda daşınması məsələsinə gəldikdə isə, bununla bağlı qanunvericilikdə hər hansı məhdudiyyət və ya qadağa yoxdur. Ancaq bunun özü də normal hal deyil. Təcrübədə belə bir qayda var ki, arxada oturan şəxs uşağı qucağında otuzdurmalıdır. Belə olan halda, həmin şəxsin özü təhlükəsizlik kəmərini mütləq bağlamalıdır. Ancaq bizdə 12 yaşınadək uşaqlar arxa oturacaqlarda çox vaxt özbaşına oturur. Təbii ki, bunlar yolverilməzdir. Sürücülər belə məsələlərə maksimum diqqətlə yanaşmalıdır. Tövsiyə olunur ki, 12 yaşadək uşaqlar da xüsusi oturacaqlara yerləşdirilsin. 12 yaşadək uşaq avtomobildə təhlükəsizlik kəmərini bağlaya bilmirsə, onda onun daşınmasının xüsusi qurğular vasitəsilə həyata keçirilməsi daha məqsədəuyğundur. Bu zaman uşaqların həyatı da daha effektiv şəkildə qorunar".
Vidadi ORDAHALLI
