"Əgər körpə bir uşağın, ananın həyatını verdiyimiz qan xilas edəcəksə, biz hər zaman belə nəcib, xeyirxah aksiyalarda canla-başla iştirak etməyə hamılıqla hazırıq". Qan vermək üçün Sabunçu Rayon Mühafizə İdarəsinin həyətinə toplaşan həmkarlarımın bu fikirləri diqqətimdən yayınmadı.
İdarənin akt zalında yaşatmaq üçün qan verməyə könüllü gələnlərin üzündə qəribə bir sevinc hissi vardı və mən o hissləri yazıya almaqda çətinlik çəkdim sözün doğrusu.
Səhiyyə Nazirliyinin B.Eyvazov adına Respublika Elmi-Tədqiqat Hemotologiya və Transfuziologiya İnstitutunun Mərkəzi Qan Bankının təşkilatçılığı və dəstəyi ilə gerçəkləşən xeyirxah aksiyada RMİ-nin rəisi, polis polkovniki Əşrəf Allahyarov başda olmaqla bütün şəxsi heyət fəal iştirak etdi. Əşrəf Allahyarov bu nəcib təşəbbüsə qoşulmağa səhhəti imkan verən hər bir əməkdaşın vətəndaşlıq borcu olduğunu diqqətə çatdıraraq, istər xidməti vəzəfələrinin icrası, istərsə də belə təşəbbüslərdə öndə olmaq üçün polis əməkdaşlarına bir daha öz sağlamlıqlarını qorumağı, zərərli vərdişlərdən uzaq olmağı tövsiyə etdi.
Yeri gəlmişkən qeyd edək ki, Respublika Elmi-Tədqiqat Hemotologiya və Transfuziologiya İnstitutunun Mərkəzi Qan Bankı tərəfindən ezam olunmuş xüsusi tibb briqadasının həkim-hemotoloqları tərəfindən hər bir donorun sağlamlığı öncədən müəyyən olunur, götürülən qan analizlərində onların sağlam olub-olmamaları müəyyənləşdirilir.
Hafiz Təmirov, polis mayoru
