Toğrul Cəfərov: "Bu cür müasir vasitələrdən istifadə olunması özünü doğruldur"
Azərbaycan Prezidentinin "Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin genişləndirilməsi barədə" 2017-ci il 10 fevral tarixli Sərəncamı dövlət başçısının humanist siyasətinin növbəti təzahürü, həyata keçirilən sistemli və genişmiqyaslı hüquqi islahatların tərkib hissəsidir.
Ümumilikdə, sərəncamı cinayət təqibi və cəzaların icrası sahələrində hüquqi islahatların yeni mərhələsi adlandırmaq olar. Cinayət təqibi və cəzaların icrası sahəsində korrupsiyanı istisna edən şəraitin təmin olunması, müasir texnoloji vasitələrin tətbiq edilməsi də sərəncamın məqsədləri sırasındadır.
Məsələ ondadır ki, cəzaların icrası və qətimkan tədbirlərinin tətbiqi zamanı elektron nəzarət vasitələri tətbiq olunacaq. Müasir dövrdə texnoloji nailiyyətlər insanı həbs etmədən onun davranışına tam nəzarəti həyata keçirməyə imkan verir və dünyanın bir sıra ölkələrində penitensiar sahədə elektron nəzarət sistemləri geniş tətbiq edilir. Elektron nəzarət vasitələrinin tətbiqi məhkumun və ya təqsirləndirilən şəxsin yerləşdiyi yeri müəyyən etməyə və onun yerdəyişmələrini qeydə almağa imkan verən texniki vasitənin həmin şəxsin üzərində yerləşdirilməsindən ibarətdir.
Məhkumlarla bağlı elektron nəzarət vasitələrinin tətbiqinə ekspertlər necə baxır? Məsələyə münasibət bildirən hüquqşünas Toğrul Cəfərovun sözlərinə görə, elektron vasitələrin tətbiqi mütərəqqi yeniliklərdən biridir: "Elektron nəzarət vasitələrinin tətbiqi məhkumun və ya təqsirləndirilən şəxsin yerləşdiyi yeri müəyyən etməyə və onun yerdəyişmələrini qeydə almağa imkan verir. Bir sıra inkişaf etmiş ölkələr uzun illərdir bu vasitələrdən istifadə edir. Bu isə o deməkdir ki, insanı həbs etmədən onun davranışına tam nəzarət etmək olar. Təsadüfi deyil ki, dünyanın bir sıra ölkələrində penitensiar sahədə elektron nəzarət sistemləri geniş tətbiq edilir. Müşahidələr göstərir ki, bu cür müasir vasitələrdən istifadə olunması özünü doğruldur. Düzdür, ölkə qanunvericiliyində bu kimi vasitələrin tətbiqi ümumən nəzərdə tutulurdu. Ancaq müxtəlif səbəblərdən hüquq-mühafizə orqanları onlardan istifadə etməyib. Hesab edirəm ki, Prezidentin sərəncamında bunun nəzərdə tutulması bu sahədə işlərin sürətləndirilməsinə təkan verəcək. Bu, mütərəqqi yeniliklərdən biridir".
Vidadi ORDAHALLI
