Şahin Musaoğlu: "Birlik hərbi-vətənpərvərlik əsərlərinin yaradılması ilə bağlı müsabiqələr keçirəcək"
Gənc nəslin vətənpərvərlik ruhunda tərbiyə olunmasında ədəbiyyat-sənət adamlarının, yaradıcı qurumların önəmli rolu olmalıdır. Bu sahədə dövlət öz üzərinə düşən işi həyata keçirir. Lakin yaradıcı qurumların əksəriyyəti bu sahədə yetərincə iş görə bilməyib.
Məsələ barədə fikir yürüdən insanlar bildirir ki, bu sahədə görülən işlər kəmiyyətcə çox olsa da, keyfiyyətcə zəifdir.
Sadə vətəndaşlar bildirir ki, yazıçı və şairlər vətənpərvərlik mövzusuna az müraciət edir, yazılan əsərlər isə onlara çatmır. Yəni onlar bu kitab və əsərlərdən xəbərsiz olur.
Azərbaycan yazıçı və şairlərinin hərbi-vətənpərvərlik ruhunda yazdığı əsərlərin böyük bir hissəsinin cəmiyyətdə tanınmamasının səbəbləri müxtəlifdir. Bu barədə danışan tənqidçilər bildirir ki, əsərlər yazılsa da, onların təbliğatı sahəsində ciddi problemlər var.
Azərbaycan Yazıçılar Birliyinin hərbi-vətənpərvərlik komissiyasının sədri, bir sıra populyar vətənpərvərlik mahnılarının müəllifi Şahin Musaoğlu ilə əlaqə saxlayıb onun bu sahədə yaşanan problemlər, görülən və qarşıda duran işlər barədə fikirlərini öyrəndik.
Əsgərlər arasında vətənpərvərlik ruhunun təbliğ edilməsində sözsüz ki, ədəbiyyatın, sənətin böyük rolu olub, bu gün də var. Əlbəttə, hər bir qələm adamının vəzifəsi Azərbaycan ordusuna töhfələr verməkdir. Ş.Musaoğlu bizimlə söhbətində qeyd etdi ki, hərbi-vətənpərvərlik ruhunda əsərlər yaradılır, sadəcə, bu əsərlərin ictimaiyyətə çatdırılması sahəsində problem mövcuddur: "Desəm ki, əsərlər yazılmır, doğru olmazdı. Yazılır. Bu gün bu mövzuya toxunulur. Qarabağ mövzusunda qalaq-qalaq kitablar yazılıb. Sadəcə, bu əsərlərin işıqlandırılması və təbliğatı ilə bağlı müəyyən problemlər var. Yazıçı-şair öz daxilinin sifarişi ilə yazır. Yaxşı olardı ki, bu işlər pərakəndə olmasın. Hesab edirəm ki, bu vacib məsələ mərkəzləşdirilmiş qaydada olmalıdır. Bu mənada ki, bir mərkəz olsun və vətənpərvərlik mövzusunda yazılan əsərlər ora təqdim edilsin, oradan isə ictimaiyyətə çatdırılsın. Bu çox yaxşı olardı
Bir müddət əvvəl Azərbaycan Yazıçılar Birliyinin rəhbərliyi ilə Müdafiə Nazirliyinin böyük bir tədbiri oldu. Tədbirdə nazir də iştirak edirdi. Yazıçılar Birliyindən də tədbirə Birlik sədri Anar, eləcə də Birliyin katibləri, xalq şairləri, alimlər də qatılmışdı. Nazir bizi Müdafiə Nazirliyinin bütün strukturları ilə tanış etdi. Bu görüş Azərbaycan Yazıçılar Birliyinin Ağsaqqallar Şurasının sədri Nəriman Həsənzadənin təşəbbüsü ilə oldu. Yəni o, məsələ qaldırmışdı ki, nazirliklə belə bir görüş keçirilməli və əməkdaşlıq əlaqələri qurulmalıdır. Cəmiyyətdə, gənc nəsildə vətənpərvərlik ruhunun qaldırılması, insanlara qələbə ruhunun aşılanması, yazıçı və şairlərin hərbi hissələrə gedib əsgərlərlə görüşməsi kimi işlərin həyata keçirilməsi üçün Yazıçılar Birliyi və Müdafiə Nazirliyi arasında memorandum imzalanması məsələsi meydana gəldi. Burada həm də hərbi xidmətdə olan insanların yaradıcılıq məhsullarının AYB orqanlarında çap olunması, onların bu quruma üzv təklif edilməsi, üzv qəbul olunması da var".
Ş.Musaoğlu, həmçinin, vurğuladı ki, yazıçı və şairlərin hərbi-vətənpərvərlik mövzusunda yazıb nəşr etdirdiyi kitabların əsgər və zabitlərə çatdırılması, eləcə də hərbi hissələrdə kitabxanaların yaradılması haqda fikirlər mövcuddur: "Müdafiə Nazirliyi ilə nəzərdə tutulan memorandum Anar müəllim tərəfindən imzalanıb, nazirin də imzalaması üçün Müdafiə Nazirliyinə təqdim edilib. Nazir sənədi imzaladıqdan sonra mart ayında bu tədbirlərin həyata keçirilməsinə başlayacağıq. Artıq Dövlət Sərhəd Xidməti ilə memorandum imzalamışıq. Səfərbərlik və Hərbi Xidmətə Çağırış üzrə Dövlət Xidməti ilə də memorandum imzalanacaq, biz onlardan cavab gözləyirik. Digər güc nazirlikləri ilə də əməkdaşlıq memorandumları imzalanacaq. 2017-ci ildə bizim fəaliyyət proqramımız təsdiq olunacaq".
Ş.Musaoğlu bildirdi ki, ola bilsin, görülən işlərdən kimlərsə razı qalmır, ancaq bu kimi hallar onların fəaliyyətini ləngitmir. Yazıçılar Birliyində müntəzəm olaraq hərbi-vətənpərvərlik mövzusunda tədbir keçirilir. "Son vaxtlar Abdulla Qurbani ilə görüş keçirdik. Ondan əvvəl Müdafiə Nazirliyinin Hərbi Orkestr Xidmətinin rəisi Yusif Axundzadənin 70 illik yubileyi münasibətilə tədbir keçirdik. Aprel hadisələri zamanı müxtəlif tədbirlər təşkil etdik. Yazıçı və şairlərimizin bununla bağlı töhfələri oldu. Lələtəpə ilə bağlı Rəşid Faxralının poeması çap olundu və kitab orada əsgərlərə təqdim edildi. "Ulduz" jurnalı bu mövzuda "Zəfər ver mənə, zəfər" adlı kitab buraxdı və kitab həm satışa çıxarıldı, həm də hərbi hissələrə paylandı. Demək istəyirəm ki, ayrı-ayrılıqda hamı yazır, ancaq bunları koordinasiya etmək bir az çətindir" - deyən komissiya sədri qeyd etdi ki, Yazıçılar Birliyi bu ildən yeni vətənpərvərlik layihələri həyata keçirəcək.
Ş.Musaoğlunun bildirdiyinə görə, Birlik hərbi-vətənpərvərlik əsərlərinin yaradılması ilə bağlı müsabiqələr keçirəcək. O, məlumat verdi ki, Qarabağ mövzusunda esse müsabiqəsi keçirilib və qalibi də müəyyən olunub. Bundan başqa, Ş.Musaoğlu qeyd etdi ki, hərbi-vətənpərvərlik mövzusunda yazılan mahnı mətnləri ilə bağlı müsabiqənin keçirilməsi nəzərdə tutulur. O, gələcəkdə də müsabiqələrin davamlı xarakter alacağını bildirdi.
Qeyd edək ki, bu gün bəzi qurumlar peşəkarlıq səviyyəsindən uzaq, kommersiya məqsədilə, vətənpərvərlik adı altında müsabiqələr keçirir. Bu da bir sıra neqativlərə, eləcə də qeyri-obyektiv seçimə gətirib çıxarır. Şahin müəllim hesab edir ki, Birliyin keçirdiyi müsabiqələr bu kimi neqativ halların qarşısının alınmasında böyük rol oynayacaq: "Allah qoysa, Müdafiə Nazirliyi ilə memorandum imzalandıqdan sonra biz hərbi hissələrə gedəcəyik və bu sahədə daha operativ işlər görüləcək. Təbii ki, görülən işlərlə bağlı ictimaiyyətə hesabatlar verəcəyik".
Ş.Musaoğlu, həmçinin, bildirdi ki, AYB təhsil müəssisələri ilə də əməkdaşlıq etməyi düşünür, O qeyd etdi ki, AYB Təhsil Nazirliyi ilə də memorandum imzalamağı planlaşdırır: "Güc qurumlarından sonra təhsil müəssisələri ilə əməkdaşlıq planı hazırlanıb. Biz Təhsil Nazirliyinin müvafiq qurumuna müraciət edərək əməkdaşlıqla bağlı onlarla da görüş keçirəcəyik. Orta və ali məktəblərdə hərbi-vətənpərvərlik ruhunun təbliğatı ilə bağlı tədbirlər keçirəcəyik. Bu çox vacib məsələdir".
İradə SARIYEVA
