"Reklam həm istehlakın artımını stimullaşdırır, həm də o sahə ilə məşğul olan ticarətçilərin marağını özünə cəlb edir"
Yerli məhsullar TV-lərdə güzəştlə reklam edilə bilər. Prezident Administrasiyasına Azərbaycanda istehsal olunan malların dövlət və özəl televiziya, radio kanallarında güzəştlə reklam edilməsi barədə təklif göndərilib. Bunu Prezident Administrasiyasının Sənədlərlə və vətəndaşların müraciətləri ilə iş şöbəsinin müdiri Süleyman İsmayılov bildirib.
O qeyd edib ki, vətəndaşlar sənayenin və sahibkarlığın inkişafına dair təkliflərində iqtisadi sahədə idarəetmənin təkmilləşdirilməsi, bəzi strukturlarda ixtisarlar aparılması, istifadəsiz qalan torpaqların dövriyyəyə cəlb edilməsi, emal müəssisələrinin yaradılması üçün faizsiz kreditlər verilməsi, iqtisadiyyatla bağlı geniş müzakirələr, "dəyirmi masa" ətrafında söhbətlər aparılması, tikinti materialları istehsalının daha səmərəli təşkil edilməsi, yarımçıq tikililərin başa çatdırılmasına dövlət dəstəyi, qeyri-neft sektoruna maraq göstərən sahibkarlar üçün müvafiq fondlar yaradılması və onlara vergi güzəştlərinin edilməsi, bir sıra rayon mərkəzlərində əvvəllər fəaliyyət göstərmiş konserv zavodlarının fəaliyyətinin bərpa edilməsi, qoyunçuluğun inkişaf etdiyi ərazilərdə yeni gön-dəri tədarükü məntəqələrinin açılması, Azərbaycanın zəngin təbiətinin imkanlarından istifadə etməklə yeni parfümeriya müəssisəsinin açılması, neft-kimya sənayesinin daha da inkişaf etdirilməsi, mühərrik yağları istehsalının təşkil edilməsi, yerli tikinti məhsulları istehsalının çeşidinin genişləndirilməsi və keyfiyyətinin yaxşılaşdırılması, şərabçılığın, əczaçılığın inkişaf etdirilməsi, Azərbaycanda istehsal olunan malların dövlət və özəl televiziya, radio kanallarında güzəştlə reklam edilməsi və sair məsələlər barədə təklif və mülahizələrini bildirirlər".
Yerli məhsulların dövlət və ya özəl telekanallarda güzəştli şəkildə reklam olunması təklifi ekspertlər tərəfindən müsbət dəyərləndirilir.
Qeyd edək ki, telekanallarda yalnız ödəniş əsasında istənilən məhsulu reklam etmək mümkündür. Yaxşı olar ki, əsas diqqət keyfiyyətə yönəlsin. Keyfiyyətli məhsul reklam olunarkən ona güzəşt tətbiq edilsin.
Aqrar sahə üzrə ekspert Vahid Məhərrəmov "Bakı-Xəbər"ə açıqlamasında qeyd etdi ki, reklam həm istehlakın artımını stimullaşdırır, həm də o sahə ilə məşğul olan ticarətçilərin marağını özünə cəlb edir. Yerli məhsulların reklamına güzəştlərin tətbiq olunması vacib amildir: "Nəzərinizə çatdırım ki, xarici ölkələrdə kənd təsərrüfatının reklamını gün ərzində təşkil edən xüsusi telekanallar var. Təəssüf ki, bizdə belə bir kanal yoxdur".
Həmsöhbətimizin sözlərinə görə, hazırda əsas diqqət keyfiyyətli məhsulun istehsalına yönəlməlidir: "Bəllidir ki, bu gün "Mercedes" markalı avtomobilin reklamına ehtiyac yoxdur. Hər kəs bu maşının necə keyfiyyətli olduğunu bilir. Bu mənada çalışmaq lazımdır ki, keyfiyyətli məhsul istehsal edək və onun daimi alıcısı olsun". V.Məhərrəmov onu da bildirdi ki, televiziyalar ödəniş şərti ortaya qoymaqla istənilən məhsulu reklam edir: "Zənnimcə, indi vəziyyət fərqli olmalıdır. Yalnız keyfiyyətli məhsul reklam olunmalıdır ki, istehlakçılar o məhsula həvəs göstərsin. Belə olan halda, məhsul istehsalı artaraq rəqabət qabiliyyətli olar və dünya bazarına çıxa bilər".
Günel CƏLİLOVA
