Ənvər Fərəcov: "Bunun sayəsində əhalinin aztəminatlı təbəqəsi tibbi müayinədən keçmək imkanı əldə edir"
Azərbaycan Respublikası Prezidentinin tapşırığına əsasən, 2014-cü ildən əhali pulsuz tibbi müayinədən keçir.
Belə ki, hər il respublikanın 18 yaşdan yuxarı əhalisinin mütləq əksəriyyəti tibbi müayinədən keçərək, ehtiyacı olanlar ambulator və stasionar müalicəyə cəlb edilir, zərurət yarandıqda ixtisaslaşmış tibb müəssisələrinə göndərilirlər.
Bu istiqamətdə görülən tədbirlərə uyğun olaraq, növbəti tibbi müayinə 2017-ci il fevralın 15-dən mayın 15-dək ölkənin bütün yaşayış məntəqələri üzrə tibb müəssisələrində keçiriləcək. Bu mühüm tədbirin yüksək səviyyədə təşkili üçün şəhər və rayon icra hakimiyyətləri səhiyyə orqanları ilə birgə bütün təşkilati işləri həyata keçirəcək, əhali arasında izahat-maarifləndirmə işi aparılmaqla vətəndaşların əhatəli şəkildə tibbi müayinəyə cəlb olunması üçün zəruri tədbirlər görüləcək.
O da məlumdur ki, İlham Əliyev Prezident seçiləndən sonra əhaliyə göstərilən tibbi xidmətin səviyyəsi xeyli yaxşılaşıb. Səhiyyə infrastrukturu əsaslı şəkildə yenidən qurulub. Yeni-yeni xəstəxanalar, ambulator mərkəzlər tikilib. O cümlədən, köhnə xəstəxanalar təmir olunub. Xəstəxanalarda müasir tələblərə cavab verən avadanlıqlar quraşdırılıb. Bütün bunların fonunda, pulsuz tibbi müayinənin həyata keçirilməsi əhalinin sağlamlığının qorunmasının tərkib hissəsidir.
Məsələyə münasibət bildirən ekspert Ənvər Fərəcovun fikrincə, əhalinin pulsuz tibbi müayinədən keçməsi sosialyönümlü siyasətin nəticəsidir: "Bunun sayəsində əhalinin aztəminatlı təbəqəsi tibbi müayinədən keçmək imkanı əldə edir. Bu da onların sağlamlığının qorunmasına xidmət edir. Çünki 2014-cü ildən bəri hər il keçirilən sözügedən aksiya zamanı yüz minlərlə insan bundan faydalanır. Bu da indiki dövrdə çox vacib məsələdir. Çünki müasir dünyanın qloballaşması, ekologiyanın sənaye tullantıları ilə çirklənməsi əhalinin səhhətinə bu və ya digər dərəcədə öz təsirini göstərir. Bu da, öz növbəsində, insanların vaxtında tibbi müayinədən keçməsi zərurətini yaradır. Ona görə də hər il keçirilən pulsuz tibbi müayinənin əhəmiyyəti böyükdür". Vidadi ORDAHALLI
