Telman Zeynalov: "Yaxşı olar ki, sənaye müəssisələri şəhərdən kənarda, yaşayış massivi olmayan ərazidə yaradılsın"
Nazirlər Kabineti fevralın 6-da "Təhlükə potensiallı təbiət və texnogen xarakterli hadisələrin başvermə ehtimalının yüksək olduğu zonalarda mühafizə tədbirlərinin növləri və onların tətbiqi halları" barədə Qərar qəbul edib. Sənəddə metallurgiya sənayesi obyektlərinin şəhərlərdən, xüsusən Bakıdan kənarda, sənaye zonasında yerləşdirilməsi təklif edilir.
Metallurgiya sənayesi müəssisələrinin ərazisi kifayət qədər geniş sahəni əhatə edir. Müəssisə daxilində yanğının baş verə biləcəyi sahəyə yanğınsöndürmə bölmələrinin hansı vaxtda çatması giriş yollarının sayı və vəziyyətindən asılıdır.
Qərarda qeyd edilir ki, bir sıra mövcud və yeni metallurgiya sənayesi müəssisələrində texniki təhlükəsizlik və yanğın təhlükəsizliyi qaydalarına əməl olunmur.
Qeyd edək ki, Bakıda bir neçə metallurgiya sənayesi müəssisəsi var. Onların paytaxt ərazisindən çıxarılması ekspertlər tərəfindən də müsbət qarşılanır.
Ekoloq Telman Zeynalov "Bakı-Xəbər"ə açıqlamasında qeyd etdi ki, iri sənayə müəssisələrinin şəhərdən kənara çıxarılması məsləhətdir: "Bəllidir ki, Sovet dönəmindən sonra Bakıda fəaliyyət göstərən bəzi sənayə müəssisələri dayandırıldı. Ancaq bəzi sənayə müəssisələri var ki, onlar hələ də işləyir. Onların işlək olması vacibdir. Ancaq yaxşı olar ki, həmin müəssisələr şəhərdən kənarda, yaşayış massivi olmayan ərazidə olsun. Sənaye metallurgiya müəssisələrində istənilən an xoşagəlməz hadisə baş verə bilər. Bu səbəbdən həmin müəssisələrin yaşayış massivinin yaxınlığında olması əhalinin sağlamlığı baxımından düzgün deyil".
Həmsöhbətimizin sözlərinə görə, hazırda paytaxt ərazisində metallurgiya sənayesi müəssisələri arasında ən böyüyü "Baku Steel Company" MMC-dir.
Ekoloq onu da bildirdi ki, iri metallurgiya müəssisələri havanın çirklənməsinə səbəb olur.
Günel CƏLİLOVA
