Natəvan Kazımova: "Məktəblərdə stomatoloji baxış zamanı uşaqlarda xəstəliklərin əlamətləri dərhal aşkar olunacaq"
Azərbaycanda orta məktəblərdə mütəmadi stomatoloji baxışların keçirilməsi təklif olunur. Bu təkliflə çıxış edən Milli Məclisin Səhiyyə komitəsinin üzvü İlham Məmmədov bildirib ki, uşaqların sağlam böyüməsi üçün stomatoloji müayinələrin keçirilməsi vacibdir:
"Əvvəllər xüsusi stomatoloji avtobuslar var idi. O avtobuslar məktəblərin həyətində uşaqların dişlərini, ağız boşluğunu yoxlayardı. İndi də bu yoxlamaların aparılması vacib məsələdir, çünki ağız boşluğunda olan infeksiyalar sonradan diş xəstəliklərinin, revmatizmin, ürək qüsurunun əmələ gəlməsi risqini xeyli artırır. Ona görə də biz səbəbə qarşı mübarizə aparmalıyıq, sonradan nəticələrin ağırlaşmasına daha çox vəsait xərcləyirik. Ağız boşluğunda infeksiyaların vaxtında aşkar edilərək aradan qaldırılması vacibdir və bu, profilaktikanın ən önəmli sahələrindən biridir".
İ.Məmmədov bununla bağlı "Əhalinin sağlamlığının qorunması haqqında" Qanuna əlavə və dəyişikliklər təklif etmək niyyətində olduğunu bildirib.
Məktəblərdə stomatoloji baxışların keçirilməsini mütəxəssislər müsbət dəyərləndirir.
Stomatoloq Natəvan Kazımova bizimlə söhbətində bildirdi ki, məktəblilər üçün stomatoloji baxışın keçirilməsi vacibdir. Məktəb yaşlı uşaqlarda adətən çənə qüsuru, diş əti xəstəliyi, kariyes və onun fəsadları müşahidə olunur: Uşaqlarda daha çox kariyes boşluğu, selikli qişalarda müəyyən somatitlər aşkarlanır: "Məktəblərdə stomatoloji baxış zamanı uşaqlarda xəstəliklərin əlamətləri dərhal aşkar olunacaq. Ağız boşluğunun, dişlərin profilaktik müayinələrinin aparılması məsləhətdir. Uşaqlara dişlərə necə qulluq etmək barədə məlumat veriləcək".
Həmsöhbətimizin sözlərinə görə, əvvəllər məktəblilər ümumi müayinəyə cəlb olunurdu: "Ümumi müayinə zamanı uşaqlardan səhhəti ilə bağlı şikayətinin olub-olmaması soruşulurdu, dişlərinə baxılırdı".
Günel CƏLİLOVA
