Nadir İsrafilov: "Nazirlər Kabinetinin qərarı təhsilin təkmilləşdirilməsi..."
Dövlət İmtahan Mərkəzinin (DİM) təklifinə əsasən, Nazirlər Kabineti tam və ümumi orta təhsil bazasında orta ixtisas təhsili müəssisələrinə, ali təhsil pilləsinin bakalavr, magistratura və rezidentura səviyyələrinə tələbə qəbulu qaydalarını təsdiq edib.
Ali təhsil müəssisələrinin bakalavriat səviyyəsinə qəbul qaydalarında edilən dəyişikliyə əsasən, abituriyentlərə seçdikləri ixtisas qrupu üzrə eyni tədris ilində keçirilən bir neçə qəbul imtahanında iştirak etməyə icazə verilir.
Cari tədris ilində bakalavriat səviyyəsinə qəbul imtahanının iki dəfə keçirilməsi nəzərdə tutulur. Bu ilin və əvvəlki illərin məzunları hər iki imtahanda iştirak edə bilər. Abituriyentlər müsabiqədə hansı imtahanın nəticəsi ilə iştirak edəcəyini özləri müəyyən edəcək.
Sözügedən yenilik elm adamları tərəfindən mütərəqqi və vaxtında atılmış bir addım hesab olunur. Bu yenilik ilk növbədə ölkədən xaricə tələbə axınının qarşısını alacaq. Məlum olduğu kimi, hər il minlərlə abituriyent öz maddi imkanları hesabına xaricdə təhsil alır. Bu həm də xaricə beyin və maliyyə axını deməkdir. Bundan başqa, bu layihənin hazırlanmasının bir səbəbi də ali təhsil müəssisələrinin maliyyələşməsi ilə bağlıdır. Hər il ali təhsil müəssisələri müəyyən sayda tələbə qəbul edir, sonrakı illərdə bəzi tələbələr təhsilini davam etdirə bilmir. O baxımından dəyişikliklər bu məsələyə də öz müsbət təsirini göstərə bilər. Maraqlıdır, bəs ekspertlər ildə iki dəfə imtahan verilməsinə necə yanaşır? Sözügedən məsələni dəyərləndirən təhsil eksperti Nadir İsrafilovun fikrincə, bakalavr səviyyəsində tələbə qəbulunun iki dəfə keçirilməsi təhsilin keyfiyyətindən çox, kəmiyyətinə hesablanan addımdır: "Nazirlər Kabinetinin qərarı təhsilin təkmilləşdirilməsi, yeniləşməsi istiqamətində atılan növbəti addımdır. Dünya standartlarına uyğunlaşmaq istiqamətində müəyyən təkmilləşmələr, yeniləşmə aparılmaldır. Dünya sistemi ilə müqayisədə belə qənaət ortaya çıxıb ki, bizim ölkədə adambaşına düşən ali təhsillilərin sayı dünyanın aparıcı dövlətləri ilə müqayisədə xeyli aşağıdır. Son zamanlar belə kurs irəli sürülüb ki, təhsil əlçatan olsun. Bakalavr səviyyəsində iki mərhələdə qəbul imtahanının keçirilməsi təhsilin əlçatan olması istiqamətində atılan addımdır. Fikrimcə, eyni tədris ilində bir neçə imtahanın keçirilməsi publik hüquqi şəxs olan Dövlət İmtahan Mərkəzinin gəlirlərini formalaşdırması üçün əlverişli olacaq. Məleykə Abbaszadə açıqlamalarında bildirmişdi ki, onlara bir milyon vəsait ayrılıb və bu, imtahan keçirilməsi üçün bəs etmir".
Vidadi ORDAHALLI
