Bahadur Bilalov: "Səhra şəraitində yaşayan ərəblər üçün gözəl, yaşıllıqla əhatə olunmuş müsəlman ölkəsi maraq doğurur"
Məlum olduğu kimi, Azərbaycan Prezidentinin ictimai-siyasi məsələlər üzrə köməkçisi Əli Həsənov Səudiyyə Ərəbistanı Krallığına səfəri çərçivəsində Ər-Riyadda Səudiyyə Jurnalistləri Assosiasiyasının idarə heyətinin sədri, Körfəz Ölkələri Jurnalistlər Birliyinin sədri, "Əl-Cəzirə" qəzetinin baş redaktoru Xalid əl-Maliki ilə görüşüb.
Görüşdə Ə.Həsənov Səudiyyə Ərəbistanı ilə Azərbaycan arasında iqtisadi əlaqələrin gələcəyi, qarşılıqlı investisiya sahəsində əməkdaşlıq imkanları barədə fikir bildirib. O qeyd edib ki, Azərbaycan gözəl iqlimi, əlverişli coğrafi şəraiti, müasir turizm infrastrukturu olan ölkədir. Bütün bunlar, həmçinin, xalqımızın zəngin mədəni irsi, qonaqpərvərliyi ölkəmizi beynəlxalq turizm üçün cəlbedici məkana çevirib: "Düşünürəm ki, Azərbaycanın turizm sektorunda Səudiyyə Ərəbistanı şirkətləri üçün çoxlu investisiya imkanları mövcuddur. Ötən il Azərbaycana Səudiyyə Ərəbistanından təqribən 10 min turist gəlib, bu il isə onların sayının 30 minə çatacağı gözlənir. Səudiyyə Ərəbistanı vətəndaşları Azərbaycanda özlərini rahat hiss edəcəklər. Ölkəmizdə onlara olan münasibət, zəngin mətbəx, ibadət evlərinin mövcudluğu - bütün bu amillər Səudiyyə Ərəbistanından gələn turistləri razı salacaq. Ən əhəmiyyətlisi budur ki, Səudiyyə Ərəbistanı vətəndaşları Azərbaycanda xoş qarşılanacaq, Qərbdə mövcud olan bütün xidmətləri ölkəmizdə görəcək, dostların əhatəsində olacaq, səfərlərindən məmnun qalacaqlar".
Ekspertlər də bu il Səudiyyə Ərəbistanından gələcək turistlərin sayının 30 minə çatacağı və bu rəqəmdən yüksək olacağı qənaətindədir.
Turizm sahəsi üzrə ekspert Bahudar Bilalov bizimlə söhbətində bildirdi ki, Azərbaycana ərəb ölkələrindən, xüsusilə Birləşmiş Ərəb Əmirliklərindən (BƏƏ) gələn turistlərin sayında ciddi artım müşahidə olunur. Və yay aylarında ölkəmizə gələcək ərəb turistlərinin sayı ötən illərlə müqayisədə daha da artacaq: "Bunun səbəblərindən biri odur ki, Azərbaycan Mədəniyyət və Turizm Nazirliyi Birləşmiş Ərəb Əmirliyində nümayəndəlik açıb. Nazirlik səviyyəsində BƏƏ Azərbaycana potensial turist göndərən ölkə qismində götürülür. Orada artıq iş aparılır. Azərbaycan müsəlman ölkəsidir. Ərəb ölkələri üçün, İran üçün dini qadağalar elə də yoxdur, sərbəstlik var. Və Avropa ilə Şərq mədəniyyəti burada sintez olub, o nöqteyi-nəzərdən ərəb ölkələrindən daha çox axın var".
Həmsöhbətimiz onu da əlavə etdi ki, səhra şəraitində yaşayan ərəblər üçün gözəl, yaşıllıqla əhatə olunmuş müsəlman ölkəsi maraq doğurur.
Günel CƏLİLOVA
