Aybəniz Səlimova: "Lazer epilyasiyası çox yüksək temperaturla müşahidə olunan prosedur olduğundan, bu zaman bəzi xəstəlikləri mütləq şəkildə nəzərə almaq lazımdır"
Gözəllik qurban tələb edir. Bu qurban ya saçdan, ya artıq çəkidən, ya da insanın hansısa istəyindən əl çəkməsi ola bilər. Zaman keçdikcə, "qurban" kəlməsi, sözün əsl mənasında, funksiyasını itirir və gözəlliyin qurbanı artıq bədənə şüa verilməsi, iynə ilə deşilməsi və s. kimi əzablı yollara keçir.
Son illər qadınlar ən çox lazer epilyasiyasından istifadə edir. Lazer epilyasiyası işıq dalğasının bədənin bir nöqtəsindən bədənə yeridilməsi və bunun nəticəsində tükün kökünün yanmasıdır. Tükün kökü yandığı üçün, artıq o nahiyədən yenidən tük artımı müşahidə olunmur.
Məlumatlara görə, lazer epilyasiyasından istifadə edənlər arasında narazılıq yaranıb. Bədənin hansı hissəsində lazer epilyasiyası tətbiq olunubsa, o nahiyədə yanıq izləri müşahidə olunur və bu hal qadınların narazılığına səbəb olur. Gözəlləşmək üçün müəyyən qədər vəsait xərcləyən xanımların üz və ya bədəninin hansısa hissəsində yanıq izi qalır.
Həkim-kosmetoloq Aybəniz Səlimova bizimlə söhbətində bildirdi ki, lazer epilyasiyası hər dəriyə tətbiq olunmamalıdır: "Dərinin o şüanı qəbul edib-etməyəcəyi öncədən müəyyən olunmalıdır. Sonra prosedur tətbiq olunmalıdır. Lazer epilyasiyasında şüanın dozasından asılı olaraq, risq də dəyişir. Uzunmüddətli istifadə birbaşa təsir etməsə də, provakasion təsiri ola bilər. Xərçəng polietioloji xəstəlikdir. Yəni bunun səbəbi çoxdur. Xərçəng termini ümumi məfhumdur və yaranması qida, radiasiya, gen, hava çirkliliyi və s. səbəblərlə birbaşa bağlıdır. Lazer epilyasiyası çox yüksək temperaturla müşahidə olunan prosedur olduğundan, bu zaman bəzi xəstəlikləri mütləq şəkildə nəzərə almaq lazımdır".
Həmsöhbətimizin sözlərinə görə, lazer epilyasiyası hamilə qadınlar, süd verən analar, istənilən damar genişlənməsi, eyni zamanda dərisində müəyyən yanıqlar - termiki, kimyəvi, günəş yanıqları, o cümlədən açıq yaralar, müxtəlif xroniki dəri xəstəlikləri olan, herpesin kəskin dövrünü keçirən insanlar tərəfindən istifadə edilməməlidir: "Həmçinin, şəkərli diabetdən, onkoloji xəstəliklərdən əziyyət çəkən insanların lazer epilyasiyasından istifadə etməsi qəti qadağandır. Eyni zamanda, günəşdən yetərincə qaralan dəriyə və dəri törəmələri olan şəxslərə lazer epilyasiyası olmaz. Yəni dəri törəmələrinin heç biri, başqa sözlə, el arasında "ət xalı" adlandırdığımız xallar - hemangioma, bazalioma, papilloma, epitelioma və s. dəri törəmələri olduğu zaman lazer epilyasiyası olmaz. Epilyasiya edildiyi zaman isə həmin xalların üzəri örtülməli və onlara lazer şüası qətiyyən toxunmamalıdır. Bundan başqa, həddindən artıq ağ və sarı tüklərə də lazer epilyasiyası məsləhət görülmür".
Günel CƏLİLOVA
