"Bu, polisin xidməti fəaliyyəti baxımından çox vacib şərtlərdən biridir"
Xəbər verildiyi kimi, daxili işlər naziri, general-polkovnik Ramil Usubov Baş Dövlət Yol Polisi İdarəsi və Bakı Şəhər Baş Polis İdarəsi DYPİ-nin Yol Patrul Xidməti alayları əməkdaşlarının sıra baxışını keçirib.
Əlahiddə Çevik Polis Alayında keçirilən, kurator nazir müavininin, DİN-in aidiyyəti Baş İdarə, idarə və xidmət rəislərinin də iştirak etdikləri tədbirdə nazir yol patrul xidməti əməkdaşlarının düzüldükləri ayrı-ayrı kolonların önündən keçərək onların zahiri görkəmi, fiziki və peşə hazırlığının vəziyyəti ilə maraqlanıb. O, tələb olunan parametrlərə uyğun gəlməyən bəzi əməkdaşların qısa müddətdə öz fiziki hazırlığını və peşəkarlığını artırmasını, göstərilən nöqsan və çatışmazlıqları aradan qaldırmasını tələb edib, irad və tövsiyələrini bildirib. Ümumən sıra baxışının nəticələrindən razı qaldığını deyib.
Bununla yanaşı, polis peşəsinin çətin və həm də şərəfli olduğunu diqqətə çatdıran nazir xüsusən əhali ilə ən çox təmasda olan yol patrul xidməti əməkdaşlarının insanlara həssas münasibətinin, diqqət və qayğısının həmişə minnətdarlıqla qarşılandığını, belə nümunəvi rəftarın polisin nüfuzunu daha da yüksəltdiyini vurğulayıb. Həmçinin, sözügedən məsələlərlə bağlı bir sıra tövsiyələr verib.
Sözügedən məsələ ilə bağlı fikirlərini "Bakı-Xəbər"lə bölüşən "Polisə Dəstək" İctimai Birliyinin rəhbəri Şəmsəddin Əliyevin sözlərinə görə, DİN spesifik xüsusiyyətləri olan qurumdur: "Burada çevik əməliyyat, isti izlə həyata keçirilən tədbirlər nəzərdə tutulur. Çünki bəzən polis fiziki cəhətdən hazırlıqlı olmayanda, bu, isti izlə həyata keçirilən tədbirlərin icrasında və yaxud da çevik reaksiya verilməsi hallarında çətinlik yaradır. Bu baxımdan daxili işlər naziri uzun illərdir bu istiqamətdə müəyyən xidmət sahələri üzrə sıra baxışları keçirir. Bir növ, şişman polis əməkdaşlarına tövsiyə verir. Bu, polisin xidməti fəaliyyəti baxımından çox vacib şərtlərdən biridir. Heç kəs zəmanət verə bilməz ki, polis xidməti fəaliyyətini həyata keçirərkən hər hansı bir fiziki gücün tətbiq olunması ilə bağlı situasiyaya məruz qalmayacaq. Belə halların yaşanması hər an mümkündür. Ona görə də nə qədər çevik, fiziki baxımdan sağlam və bacarıqlı olsa, bir o qədər polisin çətin peşəsinə töhfə vermiş olar. Hesab edirəm ki, Ramil Usubovun bu addımı təqdir olunmalıdır. Bütün dünyada bu belədir. Birləşmiş Ştatların polislərinə baxın. Onların böyük əksəriyyətinin fiziki göstəriciləri standart səviyyədədir. Azərbaycanda kök, çəkisi artıq olan polis əməkdaşları var. Hesab edirəm ki, həmin polis əməkdaşları tez-tez idmanla məşğul olmalıdır". Vidadi ORDAHALLI
