317 saylı orta məktəb - Əliqismət Səfərov: "Layihə şagirdlərin dünyagörüşünə müsbət təsir edib"
Məlahət Mürşüdlü: "Məktəblinin dostu" layihəsi şagirdlərin psixologiyası və düşüncə tərzinə müsbət təsir edib"
Məlum olduğu kimi, Təhsil Nazirliyi təhsilin idarə edilməsinin təkmilləşdirilməsi, valideynlərin ümumtəhsil müəssisələrinin həyatında daha yaxından iştirakı məqsədilə "Məktəblinin dostu" pilot layihəsinə start verib.
Təhsil sistemində həyata keçirilən "Məktəblinin dostu" layihəsi müxtəlif adlarla dünyanın bir çox ölkəsində uğur qazanıb. Əsas məqsəd məktəb-təhsilalan-müəllim üçbucağı arasında birbaşa münasibət yaradılması, eləcə də şagirdlərin özünü reallaşdırmasında həmahəng imkanlar yaradılmasıdır.
Məlumat üçün bildirək ki, "Məktəblinin dostu" layihəsi bir sıra ölkələrdə icra olunur. Bu layihənin uğurlu olduğu ekspertlər tərəfindən də vurğulanır.
"Məktəblinin dostu" layihəcinin koordinatoru Rüstəm Ağayev mətbuata açıqlamasında bildirib ki, bir sıra ökələrin məktəblərində problemlər var: "Misal üçün, şagirdlər arasında dava-dalaş, müəllim və şagird arasında anlaşılmazlıq və s. Ona görə inkişaf etmiş ABŞ, Fransa, Çexiya, Türkiyə kimi ölkələrdə məktəblərdə "Şagirdlərin dostu" olur. Bu xidmətin müxtəlif adı olsa da, hər yerdə məqsədi eynidir.
Bu çox yaxşı təşəbbüsdür. Bunun hesabına ilk növbədə məktəblərdə nizam-intizam problemi həll olunur. Eləcə də məktəblərdə müəllimlə şagird arasında müsbət ab-hava yaradır. Buna görə də Təhsil Nazirliyi bu layihənin Azərbaycan məktəblərində də tətbiq edilməsi üçün qərar qəbul edib".
Azərbaycanda pilot layihənin həyata keçirilməsinə Təhsil Nazirliyi və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi (ASAN xidmət) tərəfindən təşəbbüs göstərilib.
Layihənin əsas məqsədi məktəblərdə əsasən də tənəffüs zamanı təhlükəsizlik və nizam-intizamın tam təmin olunması, məktəblilər, müəllim və valideynlər arasında mehriban münasibətlərin aşılanmasıdır.
Tədris müəssisələrində həyata keçirilən "Məktəblinin dostu" layihəsinin nə kimi faydaları var? Məsələ ilə bağlı məktəblər və təhsil ekspertləri ilə əlaqə saxladıq.
317 saylı orta məktəbin direktoru Əliqismət Səfərov "Bakı-Xəbər"ə açıqlamasında qeyd etdi ki, çalışdığı təhsil müəssisəsində belə bir layihənin həyata keçirilməsi tək şagirdlərin deyil, eyni zamanda, pedaqoqların da ürəyincə olub: "Mən deyərdim ki, bu layihə gərək bir neçə il əvvəl keçirilərdi. Layihə çərçivəsində şagirdlərin dünyagörüşündə dəyişiklik hiss olunur. Onların həyata baxışı, təhsil haqqında fikirləri müsbətə doğru dəyişir".
Azad Müəllimlər Birliyinin rəhbəri Məlahət Mürşüdlü "Bakı-Xəbər"ə açıqlamasında bildirdi ki, "Məktəblinin dostu" layihəsində iştirak üçün elan bir neçə ay öncədən verilmişdi: "Həmin layihədə iştirak edəcək namizədlər üçün üç istiqamətdə təlim aparıldı. İlk istiqamət tədris müəssisəsində fövqəladə hadisə baş verərsə, necə hərəkət etmək barədə idi. İkinci istiqamət psixologiya ilə, digər istiqamət isə tibbi yardımla bağlı idi. Bu istiqamətlər üzrə şagirdlərin bilgiləndirilməsi müsbətdir".
Həmsöhbətimiz hesab edir ki, "Məktəblinin dostu" layihəsi şagirdlərin psixologiyası və düşüncə tərzinə müsbət təsir edib.
Günel CƏLİLOVA
