Mais Ağayev: "Sürücünün psixi və fiziki cəhətdən sağlam olması vacib şərtlərdən biridir"
Ərşad Hüseynov: "Bəzi sürücülərin tibbi müayinədən keçməməsi uzun illərin problemidir"
Yol-qəza hadisələrinin sayının artması müəyyən problemlərin mövcudluğundan xəbər verir. Məsələn, səhhətində problemi olan bəzi sürücülərin xəttə çıxması, bəzi marşrut xətlərində tibbi yoxlanış prosesinin formal xarakter daşıması və sair.
Hətta bu məsələyə Bakı Nəqliyyat Agentliyinin (BNA) baş direktorunun müşaviri Mübariz Abbasov da toxunub. O, avtobus daşıyıcıları ilə görüşü zamanı bildirib ki, sürücülərin tibbi müayinəsi lazımi səviyyədə həyata keçirilmir.
Qeyd edək ki, bəzi avtobus sürücülərinin tibbi müayinəsi formal xarakter daşıyır. Bu məsələ dəfələrlə müzakirəyə çıxarılsa da, müsbət nəticə əldə olunmayıb.
Bakı Nəqliyyat Agentliyinin İctimai əlaqələr və maarifləndirmə şöbəsinin rəhbəri Mais Ağayev "Bakı-Xəbər"ə açıqlamasında qeyd etdi ki, Bakı Nəqliyyat Agentliyi hər dəfə daşıyıcılar qarşısında bu məsələni qaldırır, sürücülərin tibbi müayinədən keçməsinin vacibliyini qeyd edir: "Bu bizim tələb deyil, qanunvericiliyin tələbidir. Və bu tələbə mütləq şəkildə əməl etmək lazımdır. Avtobuslar hər gün reysə çıxmazdan öncə mütləq texniki baxışdan keçməlidir və sürücülər də tibbi müayinə olunmalıdır".
M.Ağayevin sözlərinə görə, aparılan araşdırmalar nəticəsində müəyyən olunub ki, bir sıra daşıyıcıların işində bu sahədə müəyyən boşluqlar var: "Boşluğa səbəb isə daşıyıcıların əksəriyyətinin istehsalat bazasının olmamasıdır. Hansı daşıyıcıda ki, normal istehsalat bazası var, onlarda tibbi müayinə və texniki baxışın keçirilməsi ilə bağlı hər hansı problem yoxdur.
İstehsalat bazası olmayanlarla Bakı Nəqliyyat Agentliyi mübarizə aparır ki, bu məsələ tez bir zamanda həllini tapsın. Sərnişinlərin təhlükəsizliyinin təmin olunmasında sürücünün psixi və fiziki cəhətdən sağlam olması vacib şərtlərdən biridir".
Nəqliyyat sahəsi üzrə ekspert Ərşad Hüseynov bizimlə söhbətində bildirdi ki, bəzi sürücülərin tibbi müayinədən keçməməsi uzun illərin problemidir: "Qanunun tələbinə əsasən, hər bir sürücü reysə çıxmazdan öncə həkim tərəfindən müayinə olunmalıdır. Həmin reysin sürücü üçün yararlı olduğu həkim tərəfindən təsdiq olunarsa, avtobusu idarə etmək üçün açar ona verilə bilər. Ancaq son illər bu iş formal şəkildə həyata keçirilir".
Həmsöhbətimizin sözlərinə görə, sürücülərin sərxoş olub-olmaması, qan təzyiqi və ürək döyüntüləri yoxlanır.
Günel CƏLİLOVA
