Şahin Camalov: "Velosiped sürənlər üçün xüsusi yolun olmaması qəza sayının artmasına səbəb olur"
Azərbaycanda velosiped qəzalarının sayı artıb. Bu barədə Respublika Baş Dövlət Yol Polisi İdarəsinin İctimaiyyətlə əlaqələr şöbəsinin rəisi, polis polkovniki Kamran Əliyev media nümayəndələrinə açıqlamasında bildirib.
K.Əliyevin sözlərinə görə, 2016-cı ildə velosiped qəzaları ilə bağlı 24 yol hadisəsi qeydə alınıb, nəticədə 7 nəfər ölüb, 19 nəfər xəsarət alıb: "Hesabat dövründə məhz velosiped sürənin səhvi ucbatından 6 yol hadisəsi baş verib, nəticədə 1 nəfər ölüb, 5 nəfər yaralanıb".
Polis polkovniki bildirib ki, velosiped sürənlər bəzən təhlükəsizlik qaydalarına əməl etmir, dəbilqə taxmır, yolun əks istiqamətində hərəkət edir, işıqlandırıcı vasitələrdən istifadə etmirlər: "Yol hərəkəti haqqında" Qanunun 38-ci maddəsində deyilir ki, mühərriksiz velosipedi idarə edən şəxs xüsusi velosiped zolaqları ilə, bunlar olmadıqda isə yolun, küçənin hərəkət hissəsinin kənarı və ya yol çiyinləri ilə hərəkət etməlidir. Velosiped sürən şəxs texniki baxımdan saz və lazımi təchizatlı velosipeddən istifadə etməli, velosipedi idarə etməyə mane olan yük və ya sərnişin daşımamalıdır. Velosiped nəqliyyat vasitəsi hesab edildiyindən, onu sürənlərin də avtomobil yollarından istifadə etmək hüquqları var".
Velosiped qəzalarının sayı nə səbəbdən artır? Məsələ ilə bağlı "Təhlükəsiz Yol" Alyansının koordinatoru Şahin Camalova müraciət etdik. O, "Bakı-Xəbər"ə açıqlamasında qeyd etdi ki, velosiped istifadəçilərinin sayının artması sevindirici haldır: "Adıçəkilən nəqliyyat vasitəsindən istifadə edənlərin sayı ildən-ilə artır. Bunu istənilən şəxs müşahidə edə bilər".
Ekspert velosiped qəzalarının sayının artması səbəbi kimi Bakı yollarının bu nəqliyyat vasitəsinə uyğun olmadığını göstərdi "Yollarda bardyurların sayının çox olması, həmçinin, yolların problemli olması velosiped sürənlər üçün təhlükəlidir.
Velosiped sürənlər üçün xüsusi yolun olmaması qəza sayının artmasına səbəb olur. Velosiped sürənlər avtomobil yollarında təhlükə ilə üz-üzə qalır. Avtomobil yolunda velosipedin sürülməsi düzgün deyil".
Həmsöhbətimizin sözlərinə görə, hazırda Dənizkənarı Bulvar ərazisində velosiped sürmək üçün xüsusi yol var. Ancaq Bakının digər yollarında velosiped sürmək üçün zolaq nəzərdə tutulmayıb.
Günel CƏLİLOVA
