Azər Allahverənov: "Skandinaviya ölkələrində sürücülər iki il ərzində xüsusi hazırlıq kursu keçir"
Azərbaycanda sərnişin avtobuslarını idarə etmək hüququ qazanmaq üçün yaş hədləri ilə bağlı tələb qüvvəyə minib. Bu, Nazirlər Kabinetinin "Nəqliyyat vasitəsini idarə etmək hüququ verən sürücülük vəsiqəsi almaq istəyən şəxslərdən imtahanların qəbul edilməsi və onlara sürücülük vəsiqəsinin verilməsi qaydaları haqqında Əsasnamə"yə edilən dəyişiklikdə əksini tapıb.
Əsasnaməyə əsasən, Azərbaycan Respublikasının ərazisindəki yollarda "DE" kateqoriyası üzrə nəqliyyat vasitələrini idarə etmək hüququ 26 yaşdan hesablanıb.
Əsasnaməyə edilən dəyişikliyə əsasən, yaş həddi çərçivəsi 26 yaşdan 65 yaşadək müəyyənləşdirilib.
Məlumat üçün qeyd edək ki, "DE" qoşqusunun icazə verilən maksimum kütləsi 750 kq-dan artıq olan "D" kateqoriyasından olan avtomobillərdir. Müvafiq tələb "Yol hərəkəti haqqında" Azərbaycan Respublikasının Qanununda dəyişikliklər edilməsi barədə" 2016-cı il 30 sentyabr tarixli Qanunda əksini tapıb.
"Nəqliyyat vasitəsini idarə etmək hüququ verən sürücülük vəsiqəsi almaq istəyən şəxslərdən imtahanların qəbul edilməsi və onlara sürücülük vəsiqəsinin verilməsi qaydaları haqqında Əsasnamə"yə edilən dəyişiklikdə bu tələbin tətbiqinə başlanacaq.
Ümumilikdə, avtobus sürücüləri ilə bağlı bu yeniliyə ekspertlər necə yanaşır? Sözügedən məsələni dəyərləndirən ekspert Azər Allahverənov buna müsbət prizmadan yanaşır. Onun fikrincə, avtobus idarə edən sürücü üçün təkcə yaş kateqoriyası deyil, o cümlədən təcrübə və bacarıqlar da çox vacibdir: "Avtobus sürücüləri gün ərzində minlərlə insanın daşınması işini görür və onların həyatına görə cavabdehlik daşıyır. Bu, xüsusi səriştə və bacarıq tələb edən bir peşədir. İstər avtobusun sürətindən irəli gələn məsələləri, istərsə də gün ərzində yüzlərlə insana xidmətin göstərilməsini nəzərə alsaq, avtobusu idarə edən şəxs, birmənalı şəkildə, müəyyən təcrübəyə malik olmalıdır. Bu təcrübə həm peşə bacarıqları, həm də onun yaşı ilə bağlıdır. Məsələ burasındadır ki, bu gün avtobusu idarə edən sürücülərin əksəriyyəti gəncdir. Həmin gənclər isə ordudan tərxis olunan şəxslərdir. Onlar orduda hərbi maşınları idarə edib. İndi isə onlar sərnişindaşıma ilə məşğuldur. Bunun müsbət cəhətlərindən biri odur ki, həmin gənclər təcrübəyə malikdir. Lakin nəzərə almalıyıq ki, bunlar fərqli nəqliyyat vasitələridir. Yaşı çox olan sürücülərin həyata baxışı bir qədər fərqli olur. Beynəlxalq təcrübədə də bu amilə xüsusi diqqət yetirilir. Misal üçün, Skandinaviya ölkələrində sürücülər iki il ərzində xüsusi hazırlıq kursu keçir. Həmin şəxslərin sürücülük vəsiqəsi və müəyyən qədər təcrübəsi olsa belə, orada sürücünü işə götürərkən kurslar təşkil olunur. Bu kurslarda sürücülər bütün peşə bacarıqlarına yiyələnmiş olur. Bu baxımdan yaşın artırılması, təcrübənin tələb olunması vacib şərtlərdir".
Vidadi ORDAHALLI
