"Xəstələrə baxış sayına görə maaşların müəyyən edilməsi xəstəxanalarda alverə səbəb olacaq və korrupsiya üçün yeni bir mənbə yaranacaq"
İcbari tibbi sığortanın tətbiqindən sonra həkimlərə xidmət göstərdiyi xəstə sayına uyğun ödəniş ediləcək. Ancaq xəstə hər hansı səbəbdən narazı qalsa və eyni problemə görə 2-ci dəfə həkimə müraciət etməli olsa, həmin həkim cərimələnə və ya ona ödənişin verilməsi kəsilə bilər.
Xəstəyə ehtiyacı olmayan xidmətlər göstərildikdə və ya tibbi xidmətin keyfiyyəti qənaətbəxş olmadıqda həkimə göstərdiyi xidmətə görə ödəniş edilməyəcək. Söhbət icbari tibbi sığorta sistemində həkimlərin maaşının bonus hissəsindən gedir. Belə ki, sistemdə həkimlər aylıq standart əməkhaqqından əlavə xidmət göstərdiyi xəstə sayına uyğun bonus qazanacaq. Bu barədə İcbari Tibbi Sığorta üzrə Dövlət Agentliyinin şöbə müdiri Vüqar Qurbanov media nümayəndələrinə açıqlamasında məlumat verib.
Bu məsələdə əsas məqsəd odur ki, xəstə eyni problemlə ikinci dəfə həkimə müraciət etməsin.
Eyni zamanda, icbari tibbi sığorta olunan vətəndaşlar bəzi müayinələr üçün əlavə pul ödəməli olacaq. Məqsəd bəzi müayinələrdə sui-istifadə hallarının qarşısını almaqdır.
Məsələ ilə bağlı fikrini bildirən professor, həkim-ekspert Adil Qeybulla bizimlə söhbətində qeyd etdi ki, bu təcrübə indiyə qədər necə tətbiq edilibsə, Azərbaycanda da eyni qaydada tətbiq edilməlidir: "Düzü, bu mövzu ilə bağlı məsələləri hansı səviyyədə düşündüklərini anlamaq çox çətindir. İcbari tibbi sığorta ilə bağlı kim nə istəsə danışır. Anlamaq lazımdır ki, icbari tibbi sığortanı ilk dəfə olaraq Azərbaycan tətbiq etməyə başlamır. Bu təcrübə dünyanın bütün sivil ölkələrində tətbiq edilir. Azərbaycanda da bu təcrübə, gec-tez, tətbiq edilməlidir. Bu təcrübə indiyə qədər necə tətbiq edilibsə, Azərbaycanda eyni qaydada tətbiq edilməlidir. Sığorta təbabətinin tətbiq edildiyi yer adətən dövlət nəzarətində olan xəstəxanalardır. Burada əsas məqam budur ki, icbari tibbi sığorta yalnız vətəndaşa aid olan bir mövzudur. Bu mövzunun həkimə aidiyyəti ola bilməz. Həkimin maaşı hansısa fiksə olunmuş maaş şəklində formalaşmalıdır. Dövlət xəstəxanalarında fiksə olunmuş bir maaş olmalıdır. Bu maaşı bir həkimə bir miqdarda, digər həkimə fərqli bir miqdarda vermək mümkün deyil. Həkimləri bu cür kateqoriyalara bölmək yanlış yanaşmadır. Çünki həmin həkimlərin hər birinə diplom verilib və hər bir həkim bir sahənin mütəxəssisidir. Xəstələrə baxış sayına görə maaşların müəyyən edilməsində isə xəstəxanalarda alver başlayacaq və korrupsiya üçün yeni bir mənbə meydana gələcək. Bu cür hallarda hansısa həkimlər daha çox himayə oluna bilər. Mənim müşahidə etdiyimə görə, artıq bu məsələyə yanaşma icbari tibbi sığortanı tətbiq edənlər, bu işlə məşğul olanların beynində çox yanlış şəkildə formalaşıb. Bu da xeyli narazılığa və işin uğursuz alınmasına gətirib çıxara bilər".
Günel CƏLİLOVA
