Davud Rəhimli: "Yeni əlillik verilən şəxslərin arayışlarında onun əmək qabiliyyətini məhdudlaşdıran ifadə yazılmır"
Azərbaycanda II və III qrup əlillər əmək qabiliyyətli hesab olunacaq. Bu barədə Milli Məclisin plenar iclasında deputat Musa Quliyev "Əmək pensiyaları haqqında" Qanuna dəyişikliklərdən danışarkən deyib. O bildirib ki, bunlar insanların işlə təmin olunmasına şərait yaratmaq üçündür: "Əlillərin işə düzəlməsini gündəmə gətirmək lazımdır. Onların çalışmasını diqqətdə saxlamalıyıq".
Bununla yanaşı, M.Quliyev onu da bildirib ki, hazırda əlillik təyin olunarkən II və III qrup əlillərə əmək zəmanəti verirlər: "Deyirlər ki, bunlar işləməlidir. Amma bunlar hansı şəraitdə və necə işləyə bilərlər kimi bəndlər göstərilmir. Əmək zamanəti isə konkret göstərilməlidir. Pensiyalarla bağlı reformalar hazırlanır. Bu reformalardan sonra həmin məsələlərə yenidən baxılacaq. Sağlam adamla xəstənin əmək qabiliyyəti imkanları eyni deyil. İşə götürən şəxs əlbəttə ki, sağlam şəxsə üstünlük verəcək. Mən təklif edirəm ki, Əmək Məcəlləsində dəyişiklik edilsin. Yəni bu şəxslərə əlillik dərəcələri verilərkən onlar iş yerlərindən çıxarılmasın. İşləməyən şəxs isə əlillik dərəcəsi alana kimi əmək zənamətində onun harada işləyə biləcəyi göstərilsin. Müvafiq məşğulluq xidmətləri dövlət hesabına konkret olaraq onlara yeni peşə öyrətsin və ona konkret iş yeri təklif edilsin. Və məşğulluq haqqında qanuna dəyişiklik olsun ki, bu insanlar üçün konkret məşğulluq kvotası müəyyən edilsin".
Maraqlıdır, əlillərlə bağlı bu təkliflərə ekspertlər necə baxır? Məsələyə münasibət bildirən Əlil Təşkilatları İttifaqının sədri Davud Rəhimli bu yeniliyə müsbət prizmadan yanaşdı. Onun fikrincə, bu, əlilliyi olan şəxslərin məşğulluğunun təmin olunmasında mühüm yenilikdir: "Son günlər əlilliyi olan şəxslərin məşğulluğu ilə əlaqədar müxtəlif kütləvi informasiya vasitələrində məlumatlar yayılmaqdadır. Bu məlumatların çoxu təhrif olunmuş formadadır. II və III qrup əlilliyi olan şəxslərin məşğulluğunun təmin olunması, bununla əlaqədar pensiya və müavinətlərin kəsiləcəyi kimi informasiyalar yayılır. Əsas narahatlıq TSEK-lər tərəfindən əlillik təyin olunan zaman verilən arayışda "əmək qabiliyyətsizdir" ifadəsinin yazılması idi. Əlil Təşkilatları İttifaqı (ƏTİ) olaraq bu məsələ tərəfimizdən dəfələrlə hökumət qarşısında qaldırılıb. Əmək və əhalinin sosial müdafiəsi naziri Səlim Müslümovun əmri ilə artıq bu maneə aradan qaldırılıb. Yeni əlillik verilən şəxslərin arayışlarında onun əmək qabiliyyətini məhdudlaşdıran ifadə yazılmır. Əvvəllər əlillik almış insanlarda bu problem əmələ gələrsə, aidiyyəti üzrə TSEK-lərə müraciət etməklə onu aradan qaldıra bilərlər. İkinci məsələ işləyən zaman pensiya təminatının kəsilməsi qeyd olunur. Bu da həqiqətə uyğun deyil. İşləyən pensiyaçı və sosial müavinət alan, qanunda nəzərdə tutulduğu kimi, pensiya və sosial müavinətini də alır və alacaq".
Vidadi ORDAHALLI
