İlqar Hüseynli: "Cərimələrin maaşdan tutulması yol qəza hadisələrinin sayının azalmasına səbəb olacaq"
Bakıda cərimə olunan piyadaların cərimə məbləğini ödəməsi üçün sahə rəislərinə, təhsil müəssisələrinə müraciətlər edilib. Bu barədə Bakı şəhər Baş Polis İdarəsinin Dövlət Yol Polisi İdarəsinin (BPİ DYPİ) bölmə rəisi, polis polkovniki Vaqif Əsədov media nümayəndələrinə açıqlamasında məlumat verib.
O qeyd edib ki, piyadaların hüquq və vəzifələrinin "Yol hərəkəti haqqında" qanunun 40-cı maddəsi ilə tənzimləndiyini xatırladan V.Əsədov bildirib ki, bu maddənin tələbləri pozulduqda piyadalar qanunvericilikdə nəzərdə tutulmuş qaydada məsuliyyətə cəlb olunurlar: "Yolun təyin olunmayan yerindən keçən piyadaların əksəriyyəti 21-30 yaş arasında olan şəxslərdir ki, onların da çoxu əmək fəaliyyəti ilə məşğul olanlar və tələbələridir. Cərimə edilən piyadaların təxminən 50 faizi cərimə məbləğini ödəməkdən boyun qaçırırlar. Buna görə də həmin şəxslərin yaşadıqları ərazilərdəki sahə rəislərinə, tələbələrin oxuduqları təhsil müəssisələrinə, əmək fəaliyyəti ilə məşğul olan şəxslərin işlədikləri müəsissə və idarələrə müraciət edilib. Cərimələr işləyənlərin əmək haqqlarından tutulacaq. Piyadalardan bir daha xahiş olunur ki, piyada keçidindən istifadə etsinlər".
Şöbə rəisinin sözlərinə görə, paytaxtın 70 küçə və prospekindəki yerüstü və yeraltı keçidlər yol polisi əməkdaşları tərəfindən tam nəzarətə götürülüb: "Həmin ərazilərdə yol polisləri yaxın məsafələrdə xidmət aparır. Yol hərəkət qaydalarını pozan piyadalar aşkar edilərək, məsuliyyətə cəlb olunurlar".
Piyada keçidindən istifadə etməyən piyadaların cərimələrinin onların əmək haqqlarından tutulmasını ekspertlər müsbət dəyərləndirir.
Sosial sahə üzrə ekspert İlqar Hüseynli bizimlə söhbətində bildirdi ki, əksər piyadaların yol keçidindən istifadə etmədiyi hər kəsə bəllidir: "Bunun səbəbini piyadalar müxtəlif cür izah edirlər. Yol keçidindən istifadə etməyən piyadalar yol polisinin əməkdaşları tərəfindən saxlanılarkən etdikləri hərəkətin səhv olduqlarını anladıqlarını bildirirlər. Və bu səbəbdən bəzən cərimə ödəməkdən yayınırlar. Bəzən elə hal olur ki, yol hərəkət qaydasını pozan şəxs cərimə ödəmək üçün üzərində pul olmadığını və ya müxtəlif səbəblər gətirərək cərimədən yayınırlar. Onların cəriməsinin maaşdan tutulması düzgün qərardır. Piyadalar maaşlarından cərimə tutulmasını bilsələr onlar piyada keçidindən istifadə edərlər. Və beləliklə yol qəza hadisələrinin sayı azalar".
Günel CƏLİLOVA
