Şahin Camalov: "Artıq sükan arxasına keçən bir çox sürücülər ilk olaraq təhlükəsizlik kəmərini bağladıqdan sonra avtomobili hərəkətə gətirir"
Ötən illərlə müqayisədə keçən il baş verən yol-qəza hadisələrinin sayı azalıb. Açıqlanan statistik rəqəmlərə əsasən, 2016-cı il ərzində 2006 yol-nəqliyyat hadisəsi qeydə alınıb. Baş vermiş hadisələr nəticəsində 759 nəfər həlak olub, 2003 nəfər yaralanıb.
2015-ci illə müqayisədə yol-nəqliyyat hadisələrinin sayı 214 fakt (9,6 %), həlak olanların sayı 135 nəfər (15 %), yaralananların sayı isə 262 nəfər (11,6 %) azalıb. Bakı şəhəri ərazisində 684 yol-nəqliyyat hadisəsi qeydə alınıb, bunların nəticəsində 192 nəfər həlak olub, 691 nəfər yaralanıb. 2015-ci illə müqayisədə yol-nəqliyyat hadisələrinin, həlak olanların və yaralananların sayı, uyğun olaraq, 113 fakt (14,2 %), 37 nəfər (16,2 %) və 159 nəfər (18,7 %) azalıb.
Yol-qəza hadisələrinin sayının ötən illərlə müqayisədə azalması sevindiricidir.
Məsələ ilə əlaqədar "Təhlükəsiz Yol" Alyansının rəhbəri Şahin Camalova müraciət etdik. O bizimlə söhbətində bildirdi ki, yollarda baş verən qəzaların azalmasının bir neçə səbəbi var: "Belə ki, ilk səbəb kimi, ölkədə iqtisadi durumla bağlı olaraq avtomobil sürənlərin sayının azalmasını göstərmək olar. Artıq yol polisinin daha ciddi nəzarəti var. Bəllidir ki, çoxlu sayda cərimə yazılır və bu da öz təsirini göstərir. Sürücülər cərimə verməmək üçün qaydaları mümkün qədər pozmamağa çalışır".
Ekspertin sözlərinə görə, yol-qəza hadisələrinin azalmasının əsas səbəblərindən biri də yol infrastrukturunun düzəlməsidir: "Yolların bərbad halda olması da qəzaya səbəb olan amillərdən biri idi. Eyni zamanda, qəzaların azalmasına sürücülərin yol hərəkəti qaydalarına riayət etməsi di təsir göstərir. Artıq sükan arxasına keçən bir çox sürücülər ilk olaraq təhlükəsizlik kəmərini bağladıqdan sonra avtomobili hərəkətə gətirir. Həmçinin, sürət həddinin aşılmaması da qəza hadisələrinin azalmasına səbəb olur".
Həmsöhbətimiz onu da əlavə etdi ki, yol-qəza hadisələrinin azalması sevindiricidir: "Ötən illər ərzində baş verən yol-qəza hadisələri zamanı nə qədər insan həyatını itirib. Eyni zamanda, bəzi insanlar müxtəlif dərəcəli xəsarətlər alıb".
Günel CƏLİLOVA
