"Yeraltı və yerüstü keçidlər olan yerlərdə piyadaların həmin keçidlərdən istifadə etmədiyini istənilən şəxs müşahidə edə bilər"
Məşhur filmlərdən birində tez-tez istifadə olunan "qaydalar onları pozmaq üçündür" məsəli təəssüf ki, bəzi insanların adi həyat tərzinə çevrilir. Onlar qaydaları, sadəcə, pozmaq xətrinə pozur və bunun hansı faciələrə səbəb olacağından xəbərsizdir. Avtomobil yollarından keçən piyadalar yolun onlara aid olmayan hissələrindən keçərək yol hərəkəti qaydalarını ciddi şəkildə pozur.
Piyadaların onların təhlükəsizliyi üçün quraşdırılan yeraltı və yerüstü keçidlərdən, piyada zolaqlarından istifadə etməməsi sürücülərə qəza şəraiti yaradır.
Qeyd edək ki, Bakıda yol polisi əməkdaşları piyadalarla əlaqədar ciddi mübarizə tədbirləri həyata keçirməyə başlayıb. Bunu Bakı Şəhər Baş Polis İdarəsinin Dövlət Yol Polisi İdarəsinin ictimai qurumlarla əlaqə bölməsinin rəisi, polis polkovniki Vaqif Əsədov media nümayəndələrinə açıqlamasında deyib. O bildirib ki, piyadaların avtomobillərlə vurulması çox ciddi narahatlıq doğurur: "2016-cı ildə piyadaların avtomobillərlə vurulması ümumi yol-nəqliyyat hadisələrinin təxminən 60 faizini təşkil edir ki, bu da çox ciddi narahatlıq doğurur. Eyni zamanda, 2017-ci il ərzində Azərbaycanda böyük idman tədbirlərinin keçirilməsi nəzərdə tutulur və ölkəmizə çoxsaylı qonağın gəlməsi gözlənir. Onların təhlükəsizliyinin təmin edilməsi ilə bağlı tədbirlər görüləcək. Həmçinin, piyadalar arasında nizam-intizamı yüksəltməyə çalışacağıq. Piyadalarla bağlı təsirli tədbirlərin görülməsinə başlamışıq".
V.Əsədov qeyd edib ki, yeraltı və yerüstü piyada keçidlərində yol polisi əməkdaşları xidmətini ciddi şəkildə davam etdirir, piyadalara təyin olunan cərimələrin ödənilməsi ilə bağlı materiallar artıq məhkəmələrə və aidiyyəti üzrə icra məmurlarına göndərilir.
Bölmə rəisi əlavə edib ki, bu tədbirlər piyadaların avtomobillərlə vurulması hallarının azaldılması məqsədi daşıyır.
Onu da bildirək ki, Bakı Şəhər Dövlət Yol Polisi piyadaların yol hərəkəti qaydalarına necə riayət etməsini müəyyən etmək məqsədilə paytaxt yollarında reydlər keçirir.
Sosial sahə üzrə ekspert İlqar Hüseynli bizimlə söhbətində bildirdi ki, piyadalarla bağlı məsələ kifayət qədər aktualdır: "Piyadaların yol hərəkəti qaydalarını pozması ilə bağlı dəfələrlə aidiyyəti qurumlar tərəfindən reydlər keçirilir. Keçirilən çoxsaylı reydlər piyadaların yol hərəkəti qaydalarını pozmağa meylli olduğunu göstərir. Bu özünü daha çox piyada zolaqları və keçidlərdə göstərir. Yolda piyada zolağı olsa belə, bundan istifadə etməyən hansısa piyada həmin zolağa 200-300 metr qalmış daha yaxın yerdən yolu qanunsuz keçir. İcazə olmayan yerdən keçərək öz həyatını təhlükəyə atır və sürücülərin də qəza şəraiti törətməsinə şərait yaradır. Belə bir vəziyyətdə, təbii ki, piyadada günah var və o, piyada zolağından istifadə edərək yolu keçməlidir. Amma bunu etmir. Beləliklə, yolda qəza şəraiti yaranır".
İ.Hüseynlinin sözlərinə görə, yol hərəkəti qaydalarını pozan piyadalara qarşı cəzalar daha da sərtləşdirilməlidir.
Həmsöhbətimiz onu da əlavə etdi ki, yeraltı və yerüstü keçidlər olan yerlərdə piyadaların həmin keçidlərdən istifadə etmədiyini istənilən şəxs müşahidə edə bilər: Ekspert qəzetimiz vasitəsilə piyadalara məsləhət görür ki, heç bir bəhanə gətirmədən piyada zolaqlarından istifadə etsinlər: "Piyada zolağı ilə yolu keçən piyada nəqliyyat vasitələrinin hərəkətinə diqqətini azaltmamalıdır. Düşünməməlidir ki, "mən piyada zolağına ayağımı qoydum və istənilən cür yolu keçə bilərəm, mənə yol verməlidirlər. Bu, yanlış təsəvvürlərdir. Piyada, piyada zolağı ilə getdikdə belə, ehtiyatı əldən verməməlidir".
Günel CƏLİLOVA
