Bahadur Bilalov: "Reklam mətnlərinin yerli dillə yanaşı, əcnəbi dildə yazılması ölkəyə gələn turistlərin sayının artmasına təkan verəcək"
Məlum olduğu kimi, Prezident İlham Əliyev "Azərbaycan Respublikasında dövlət dili haqqında" Azərbaycan Respublikasının Qanununda dəyişikliklər edilməsi barədə Fərman imzalayıb.
Fərmanda qeyd olunur: "Reklamvericinin tələbinə əsasən reklam qurğularında yerləşdirilən reklamın mətnində Azərbaycan Respublikasının dövlət dili ilə yanaşı, digər dillərdən istifadə oluna bilər. Bu halda xarici dildə olan mətn dövlət dilində olan mətndən sonra yerləşdirilməli, dövlət dilində olan mətnin tutduğu sahədən kiçik olmalı və reklamın yerləşdiyi ümumi sahənin üçdə birindən çox olmamalıdır. Mətndə digər dillərdə ifadə olunan əmtəə nişanı və coğrafi göstərici müvafiq icra hakimiyyəti orqanı tərəfindən qeydə alındığı formada göstərilməlidir".
Ekspertlərin fikrincə, dövlət dili ilə yanaşı, xarici dillərdə reklama icazə verilməsi ölkə iqtisadiyyatına müsbət təsir edəcək. Turizm sahəsi üzrə ekspert Bahadur Bilalov bizimlə söhbətində bildirdi ki, reklamın əcnəbi dildə olmasına icazə verilməsi müsbət haldır: "Belə bir fərmanın imzalanması ölkə iqtisadiyyatına müsbət təsir edəcək. Reklam mətnlərinin yerli dillə yanaşı, əcnəbi dildə yazılması ölkəyə gələn turistlərin sayının artmasına təkan verəcək. Bəllidir ki, turist sayının artması ölkə iqtisadiyyatına müsbət təsir edir. Əcnəbi turist Bakı küçələrində gəzərkən ingilis və ya hansısa əcnəbi dildə yazılan dükanın adını görür və dərhal həmin obyektdən özünə lazım olanı alır. Bu hal ilk növbədə büdcəmizə müsbət təsir edəcək. Əcnəbi turistlər nə qədər çox alış-veriş edərsə, büdcəyə daxil olan gəlirin məbləği artar. Ölkəsinə qayıdan turist Azərbaycanda gördüyü məkanların və ya brend dükanların adlarını rahatca öz yaxınlarına anladacaq. Belə olan halda, həmin şəxslərdə Azərbaycana gəlmək marağı yaranacaq".
Həmsöhbətimizin sözlərinə görə, reklam mətnlərinin doğma dillə yanaşı, əcnəbi dildə də yazılması zamanı bəzi məqamlar nəzərə alınmalıdır: "Reklam tablosunda reklam mətni və ya hansısa obyektin adı ilk öncə Azərbaycan dilində böyük hərflə yazılmalıdır. Onun yanında və ya aşağı hissədə mətnin əcnəbi dilə tərcümə olunmuş variantı qeyd oluna bilər. Lakin burada bir məqama xüsusi diqqət yetirmək lazımdır ki, xarici dildə yazılan ifadə və ya mətnin şrifti doğma dillə yazılandan böyük olmamalıdır".
Günel CƏLİLOVA
