"Uşağın inkişafına, onun gələcək həyatına təsir edən zorakılığı törədən şəxs ömürlük həbs cəzası almalıdır"
"Uşaqlara qarşı amansız zorakılıq törədənlərə ömürlük həbs cəzası verilməlidir. Şəxsən mən onların ömürlük həbslə cəzalandırılmasının tərəfdarıyam". Bunu Milli Məclisin Ailə, qadın və uşaq məsələləri komitəsinin sədri Aqiyə Naxçıvanlı "Uşaqların sağlamlığına və inkişafına ziyan vuran informasiyalardan qorunması haqqında" yeni qanun layihəsi barədə çıxış edərkən bildirib.
A.Naxçıvanlı deyib ki, bu məsələdə başqa alternativ çıxış yolu olmamalıdır: "Yəqin ki, uşaqlara qarşı amansız zorakılığın qarşısını almaq üçün müəyyən təkliflər hazırlayıb Milli Məclisdə qaldıra bilərik".
Komitə üzvü olan deputat Astan Şahverdiyev isə bildirib ki, Azərbaycanda yetkinlik yaşına çatmayanları terror qruplarına qoşulmağa, narkotik maddələrə və "uşaqbazlığ"a təhrik edənlərə qarşı cəzalar daha da sərtləşdirilməlidir: "Belə şəxslərə qarşı ömürlük həbs cəzası verilməsini məqbul hesab edirəm".
Uşaqlara qarşı amansız zorakılıq törədənlərin ömürlük həbslə cəzalandırılması təklifini eksperlər də müsbət dəyərləndirir. "Təmiz Dünya" İctimai Birliyinin rəhbəri Mehriban Zeynalova "Bakı-Xəbər"ə açıqlamasında qeyd etdi ki, uşaqlara qarşı amansız, sərt cinayətlər törədənlər ciddi cəzalandırılmalıdır: "Belə bir təklifin verilməsi yaxşıdır. Ancaq bunun meyarları tam olaraq açıqlanmalıdır ki, sabah ondan sui-istifadə etməsinlər".
Həmsöhbətimiz hesab edir ki, uşağın inkişafına, onun gələcək həyatına təsir edən zorakılığı törədən şəxs ömürlük həbs cəzası almalıdır: "Bura daxildir uşaqların seksual zorakılığa məruz qalması, ondan istismar etmək, sağlamlığına ciddi zərər vurulması. Həmçinin, ailələrinin təhriki ilə uşaqlar terror qruplarına qoşulur. Belə olan halda, o uşaqların həyatı təhlükəyə atılır. Uşağı terror qruplarına qoşulmağa məcbur edən şəxs ömürlük həbs cəzası almalıdır".
M.Zeynalova onu da əlavə etdi ki, övladını tənbeh etmək məqsədildə cəzalandıran valideynlər nəzərə alınmalıdır: "Ola bilər ki, bir insanın başqası ilə ədavəti var. Ondan qisas almaq üçün hüquq-mühafizə orqanına müraciət edib deyə bilər ki, filan şəxs övladına qarşı zorakılıq törədir. Bu kimi halların araşdırılması üçün müəyyən meyarlar hazırlanmalıdır".
M.Zeynalovanın fikrincə, uşaqların sağlam inkişafı mövzusunda açıq müzakirələr təşkil olunmalıdır: "Həmin müzakirələrdə uşaq problemləri ilə məşğul olan təşkilatlar, sosial işçilər dövlət qurumları birgə iştirak edib ümumi nəticəyə gəlməlidir".
Günel CƏLİLOVA
