Kamran Əsədov: "Təhsilin inkişafı üçün ciddi tədbirlər görüldüyünü nəzərə alsaq, Azərbaycana rəqabətə davamlı universitetlər lazımdır"
Məlahət Mürşüdlü: "Dünyanın bir çox ölkələrində ali məktəblərin qiymətləndirilməsi reytinqi var"
"Azərbaycanda ali məktəblərin reytinq və kateqoriyası müəyyənləşdiriləcək. Məsələ ilə bağlı Təhsil Nazirliyi tərəfindən xüsusi qayda hazırlanıb". Bu sözləri Təhsil Nazirliyinin Elm, ali və orta ixtisas təhsili şöbəsinin ali, orta ixtisas və əlavə təhsil sektorunun müdiri Sülhəddin Gözəlov məzunların məşğulluq imkanlarının artırılması məqsədilə keçirilən forumdakı çıxışında deyib.
S.Gözəlov qeyd edib ki, reytinq və kateqoriyalar müəyyənləşən zaman məzunların elmi-tədqiqat və istehsalat əlaqələrinin yerinə yetirilməsi və işlə təmini əsas götürüləcək.
Ekspertlər hesab edir ki, ali məktəblərin reytinq və kateqoriyasının müəyyənləşdirilməsi tədrisin keyfiyyəti, məzunların işlə təminatının yüksək səviyyəyə çatmasında vacib rol oynayacaq.
Təhsil eksperti Kamran Əsədovun sözlərinə görə, son illər ölkə rəhbərliyi tərəfindən təhsilin inkişafı üçün ciddi tədbirlər görüldüyünü nəzərə alsaq, Azərbaycana rəqabətə davamlı universitetlər lazımdır: "Ölkə vətəndaşları dəfələrlə özəl universitetlərin yaratdığı problemlərlə qarşılaşıb. Onların insanımızın başına açdığı oyunlar çətin ki, unudulsun. Son belə ağır zərbəni Azərbaycan Beynəlxalq Universiteti vurmuşdu. Beynəlxalq Universitetin tələbələrə yaratdığı problem hələ də davam edir. Ondan sonra insanların özəl ali təhsil müəssisələrinə inamı azaldı. Daha sonra bağlanan digər universitetlərin tələbələri başqa özəl universitetlərə köçürüldü. Bu siyahıya Təfəkkür Universiteti də daxil oldu. Bu gözlənilən idi. 2016-cı il ali məktəblərə qəbul imtahanlarından sonra plan yerlərinə yetərincə abituriyent toplaya bilməyən universitetin bağlanması qaçılmaz idi".
Ekspert qeyd etdi ki, dünyada ali təhsil müəssisələrinin gəlirinin böyük hissəsini onların ixtiraları təşkil edir. Ancaq bizdə isə tamamilə fərqlidir. Universitetlərin gəlir mənbəyi tələbənin ödədiyi təhsil haqqıdır: "Hazırda Azərbaycanda 54 ali təhsil müəssisəsi fəaliyyət göstərir. Hesab edirəm ki, hələ bir neçə universitetin bağlanması təhsil sahəsinə o qədər də böyük təsir göstərməyəcək. Bu, digər universitetlərin rəqabət qabiliyyətinin artırılmasına xidmət edəcək".
Azad Müəllimlər Birliyinin rəhbəri Məlahət Mürşüdlü bildirdi ki, dünyanın bir çox ölkələrində ali məktəblərin qiymətləndirilməsi reytinqi var: "Azərbaycanda da ayrı-ayrı ictimai təşkilatlar tərəfindən qiymətləndirmə işləri aparılıb. İndi isə məhz Təhsil Nazirliyi tərəfindən bu reytinqin müəyyən olunması alqışlanası addımdır, lazımi tədbirdir. Lakin qiymətləndirmənin əsasnaməsi, meyarları olmadan qərar haqqında dəqiq fikir bildirmək çətindir.
Bütün hallarda, reytinq və kateqoriyanın müəyyənləşməsi universitetlər arasında sağlam rəqabətin formalaşmasına gətirib çıxara bilər. Yəqin ki, burada söhbət maddi-texniki bazadan, universitetlərin yataqxanasından, kadr bazasından, təlimin keyfiyyətindən gedir. Odur ki, qərar təhsilin keyfiyyətinə müsbət təsir göstərə bilər. Əsasnamə tam açıqlandıqdan sonra dəqiq fikir bildirmək mümkündür".
Günel CƏLİLOVA
