Taliyə İbrahimova: "Elə informasiyalar var ki, onlar uşaqların sağlamlığına və inkişafına birbaşa ziyan vura bilər"
Mətbuatda və sosial şəbəkələrdə uşaqların sağlamlığına və inkişafına ziyan vuran informasiyaların qarşısı alınacaq.
Bununla bağlı Milli Məclisin Ailə, qadın və uşaq məsələləri komitəsi tərəfindən "Uşaqların sağlamlığa və inkişafa ziyan vuran informasiyalardan qorunması haqqında" qanun layihəsi hazırlanıb. Məqsəd azyaşlıların xoşagəlməz informasiyalardan uzaq tutulmasıdır. Bu cür informasiyalar uşaqların gələcək inkişafının qarşısını alır.
Ailə, Qadın və Uşaq Problemləri üzrə Dövlət Komitəsinin Hüquq şöbəsinin müdiri Taliyə İbrahimova "Bakı-Xəbər"ə açıqlamasında qeyd etdi ki, "Uşaq hüquqları haqqında" Qanunun 15-ci maddəsinə əlavə olunub ki, uşaqların sağlamlığına və inkişafına zərər verən informasiyalar müvafiq qanunla tənzimlənir: "Bundan sonra ölkə başçısı İlham Əliyevin tapşırığına əsasən, qeyd olunan qanun layihəsinin hazırlanması üzrə iş aparıldı. Hazırda qanun layihəsi hazırdır".
T.İbrahimovanın sözlərinə görə, belə bir qanunun qəbul olunmasında məqsəd uşaqların yaşına uyğun olmayan informasiyalar əldə etməsinin qarşısını almaqdır. Bu sahəyə dövlət nəzarəti həyata keçirilməlidir: "Elə informasiyalar var ki, onlar uşaqların sağlamlığına və inkişafına birbaşa ziyan vura bilər. Kütləvi informasiya vasitələrində uşaqların psixologiyasına təsir edən məlumatlar yayılır. Bununla bağlı xüsusi tənzimlənmənin olması çox vacibdir. Həmin qanun layihəsində artıq informasiyaların təsnifatı aparılır. İnformasiyalar uşaqlar üçün zərərli olan və onlar arasında dövriyyəsinə məhdudiyyət qoyulan kateqoriyalara bölünür. Bundan irəli gələrək informasiyaların yaş təsnifatı aparılır. Yaş təsnifatına uyğun informasiyaların növləri müəyyən olunur. Qanun layihəsində KİV üçün xüsusi tələblər müəyyən olunub. Kütləvi tədbirlərdə belə elan və ya dəvətnamələr xüsusi işarələrlə yazılmalıdır".
Həmsöhbətimiz onu da əlavə etdi ki, bu cür informasiyaların ekspertizası ilə bağlı ümumi tələblər var. Bu sırf dövlət nəzarətinə aid olan məsələdir: "İnformasiya uşağın inkişafına zərər vurursa, dövlət tərəfindən həmin məlumatın yayılmasının qadağası layihədə əks olunub".
Günel CƏLİLOVA
