Musa Quliyev: "Göz bankının yaradılması üçün bir neçə məsələ öz həllini tapmalıdır"
Adil Qeybulla: "Göz bankı yaradılmazdan öncə bu sahəyə mütəxəssislər cəlb olunmalıdır"
Azərbaycanda göz qişalarının saxlanması üçün göz bankı yaradıla bilər. Bu barədə məsələ Milli Məclisin Səhiyyə komitəsinin sədri Əhliman Əmiraslanov tərəfindən qaldırılıb.
Ə.Əmiraslanov bildirib ki, göz bankını yaratmaq elə çətin məsələ deyil: "Maliyyə də çox lazım deyil. Sadəcə, əhali arasında maariflənmə işləri aparılmalıdır ki, meyitdən buynuz qişanın götürülməsinə icazə versinlər. Niyə insanlar Türkiyədə, İranda buna icazə verirlər, amma bizdə vermirlər? Ona görə də maariflənmə tədbirləri aparılmalıdır.
Mən bir neçə müddətdir araşdırıram ki, görəsən hansı qanunumuzda buynuz qişanın ölkəyə gətirilməsinə qadağa qoyulub. Amma belə bir qadağa heç bir qanunda yoxdur. Sadəcə, Nazirlər Kabineti qərara dəyişiklik etməlidir. Biz bu məsələnin tez həllinə nail olmaq üçün işçi qrup yaradaq. Onlar da müvafiq qurumlarla işləyib bu məsələnin həllinə nail olsunlar".
Göz bankının yaradılması təklifinə münasibət bildirən Milli Məclisin Səhiyyə komitəsinin sədr müavini, millət vəkili Musa Quliyevin fikrincə, bunun üçün bir neçə məsələ öz həllini tapmalıdır: "Göz qişası yalnız meyitdən götürülür. Azərbaycanda meyitdən göz qişası götürmək olar, amma "Transplantasiya haqqında" Qanunun bu müddəasını reallaşdırmaq üçün beyin ölümünün kriteriyaları müəyyən olunmalıdır. Səhiyyə Nazirliyi tərəfindən bu kriteriyalar müəyyənləşib və təsdiq üçün Nazirlər Kabinetinə göndərilib.
Eyni zamanda, meyitdən orqan və toxumaların götürülməsi üçün müvafiq klinikalar olmalıdır və bu iş həmin klinikalarda həyata keçirilməlidir. Bu məsələlər reallaşdıqdan sonra Azərbaycanda göz bankının yaradılması mümkündür".
Professor, tibbi ekspert Adil Qeybulla "Bakı-Xəbər"ə açıqlamasında qeyd etdi ki, ölkədə göz bankının yaradılması təklifi təqdirəlayiqdir. Professor tək göz deyil, digər orqanlar üzrə də bankın yaradılmasını təklif edir. Ancaq həmsöhbətimiz onu da qeyd etdi ki, göz bankı yaradılarsa, mənbənin necə tapılacağı sual altındadır: "Adətən beyin ölümü keçirən xəstələrin orqanından istifadə olunur. Bizdə isə bu sahədə vəziyyət qənaətbəxş deyil. Çünki beyin ölümü keçirən şəxsin orqanlarından istifadəyə razılıq məsələsi hələ də aktualdır. Bu sahədə də təbliğatı gücləndirmək lazımdır ki, əhalinin orqan transplantasiyasına münasibəti dəyişsin. Azərbaycanda da dünyasını dəyişən insanların yaxınları ölmüş şəxsin orqanlarından transplantalogiya məqsədilə istifadə etməyə icazə versələr, donorun tapılması problemi həll olunar".
Həmsöhbətimizin sözlərinə görə, göz bankı yaradılmazdan öncə bu sahəyə mütəxəssislər cəlb olunmalıdır: "Orqan transplantasiyası keçirən xəstəxanaya həkimlərin və orqanın aparılıb-gətirilməsi üçün xüsusi komissiya yaradılmalıdır".
Günel CƏLİLOVA
