Samir Əliyev: "Gömrükdə dərmanların gətirilməsi ilə bağlı xüsusi bir limit yoxdur"
Azərbaycanda bəzi dövlət rüsumlarının məbləğində dəyişiklik edilir. Bu barədə Milli Məclisin İqtisadi siyasət, sənaye və sahibkarlıq komitəsinin bir neçə gün öncə keçirilən iclasında "Dövlət rüsumu haqqında" Qanuna dəyişiklik edilməsi ilə bağlı qanun layihəsinin müzakirəsi zamanı Maliyyə Nazirliyinin Vergi siyasəti və gəlirlər şöbəsi müdirinin müavini Fikrət Şirinov bildirib.
Onun sözlərinə görə, sahibkarlıq fəaliyyətinin stimullaşdırılması, əlverişli biznes mühitinin yaradılması və onların ilkin maliyyə resurslarının formalaşdırılması məqsədilə bəzi lisenziyalar üzrə dövlət rüsumunun məbləğləri bir neçə dəfə aşağı salınır.
F.Şirinov əlavə edib ki, dərman vasitələrinin satışı ilə məşğul olmaq üçün lisenziyanın alınması üçün dövlət rüsumu hazırda 5500 manat olduğu halda, təklif olunan dəyişiklikdə dərman vasitələrinin pərakəndə satışı üçün cəmi 1000 manat dövlət rüsumu müəyyən edilib.
Maraqlıdır, dərman vasitələrinin satışı ilə məşğul olmaq üçün lisenziya alınmasına dövlət rüsumunun 1000 manata endirilməsi dərman preparatlarının satış qiymətinə təsir edə bilərmi?
İqtisadçı-ekspert Samir Əliyev "Bakı-Xəbər"ə açıqlamasında qeyd etdi ki, lisenziyanın qiymətinin aşağı salınması dərmanların satış qiymətinə təsir göstərməyəcək: "Bəllidir ki, lisenziya birdəfəlik xərcdir. Bu fəaliyyətlə məşğul olanlar ilkin olaraq lisenziya məbləğini ödəyir. Qiymət aşağı salınarsa, bunun dərmanların satış qiymətinə təsir edəcəyini düşünmürəm. Nəzərə almaq lazımdır ki, dərman bizə əsasən xarici ölkələrdən gətirilir. Dərmanların satış qiyməti daha çox manatın məzənnəsindən asılıdır".
Həmsöhbətimiz hesab edir ki, lisenziyanın alınması üçün dövlət rüsumunun 1000 manata salınması dolayı yolla dərmanların qiymətinə təsir edə bilər: "Lisenziyanın alınması üçün tələb olunan dövlət rüsumunun aşağı salınması aptek açmaq istəyənlərin sayına təsir edə bilər. Bəllidir ki, gömrükdə dərmanların gətirilməsi ilə bağlı xüsusi bir limit yoxdur. Onu da qeyd etmək lazımdır ki, dərmanlar gətirilən zaman Səhiyyə Nazirliyinin xüsusi rəyi tələb olunur. Dərmanların gətirilməsi ilə bağlı Səhiyyə Nazirliyinin rəyi yüngülləşdirilərsə, bu sahədə dəyişiklik hiss oluna bilər".
Günel CƏLİLOVA
