Bəzən çevrəmizdə baş verənlərə seyrçi münasibət bəsləyirik və onun ağır nəticələrini görəndən sonra tədbir görməyə başlayırıq. Əksər hallarda bu belədir. Məsələn, görəndə ki, küçədə iki-üç nəfər ictimaiyyət arasında özünü apara bilmir, davranışlarına nəzarəti itirib, yanlarından keçib gedirik ki, xətası uzaq olsun. Və ya açıq-aşkar özünü şübhəli aparan birini polisə nişan verməyə tələsmirik.
Kaş ki, qanımızdakı bu səbri, təmkini və "dözümlü"lüyü qanunlara, qanun qoruyucularına da göstərə biləydik. Kaş ki, tarixən el qınağından qorxan, ətrafdakıların təpkisinə uyarlı həyat, yaşam tərzi seçən soydaşlarımız bu həssaslığı qanunun, elementar etik davranış normalarının tələblərinə münasibətdə də göstərəydilər.
"Olmaz"lara səbrsizik, itaət etmirik. Haqlı olaraq cəzalananda isə... Yəqin ki, bunu özünüz təsəvvür etdiniz...
Bunları yazmaq elə də asan deyil. Öz ayıblarımıza güzgü tutmaq istəmirəm. Ancaq bu yaxınlarda oxuduğum hadisəyə münasibətimi bildirmək üçün bunları yazmaya bilməzdim.
Demək belə. Bir neçə gün öncə Astara Rayon Polis Şöbəsinin Dövlət Yol Polisi Bölməsinin əməkdaşları qayda pozuntularını aşkarlamaq məqsədilə reyd keçiriblər. Qısa müddətdə 50-yə yaxın nəqliyyat vasitəsi saxlanıb. Onlardan 20-si barədə inzibati protokol tərtib edilib. Həmin günü saxlananlar elə bir şou göstəriblər ki, gəl görəsən. Düzdür, polis öz işini görüb. Ancaq məni yandıran bəlkə də düz bir əsr bundan öncə Mirzə Cəlili, Üzeyir bəyi, Mirzə Ələkbər Sabiri və çoxlarını vərəmlədib öldürən səhnələrin, yaşananların bu gün XXI əsrdə təkrarlanmasıdır.
Biz niyə beləyik axı? Texniki göstəriciləri tələblərə cavab verməyən avtomobildə ailəsini yığıb toya-nişana aparan soydaşımızın sərxoş vəziyyətdə avtomobili idarə etməsi onun yox, həm də hər birimizin faciəsidir. Çünki bir ailənin faciəsi cəmiyyətin dayaqlarının çöküşünə rəvac verir və təkcə maddi ziyanla deyil, psixoloji travmalarla da insanlar əzab çəkir.
Polis səni, məni düşünür, ey astaralılar, leriklilər, gədəbəylilər, şəmkirlilər, qubalılar, vətənimin əziz insanları. İnsan üçün ən böyük nemət Yaradanın verdiyi ömrü əzizləri, doğmaları ilə birlikdə sağlam və mənalı yaşamaqdır.
Reyd zamanı polisin "Nə üçün spirtli içki içib maşın sürürsən" sualına "rəis, pivə içmişəm də", - deyib, sonra da asayiş keşikçisinin üstünə maşın sürəndən nə gözləmək olar?
Qaydalara riayət etmək hər birimizin borcudur. Törətdiyimiz xoşagəlməyən irili-xırdalı hər hansı bir əməldən əgər yaxın çevrəmiz ziyan görürsə, demək ki, biz cəmiyyətimiz üçün də təhlükəli biriyik. Özümüzü təcrid etməyə gücümüz çatmasa da, bizi qanunlara riayət etməyə dəvət edənləri dinləməyə mədəniyyətimiz olmalıdır. Nəinki onların üstünə maşın sürmək kimi... Sonun tamamlamaq elə də çətin deyildi...
Hafiz Təmirov, polis mayoru
