Ruslan Quliyev: "Çeşidli xidmətlər, otellərin sayının artırılması, ixtisaslı kadrların sayının yetərincə olması və infrastrukturun inkişafı istiqamətində görülən işlər önəmlidir"
"Momondo" beynəlxalq turizm axtarış sistemi 2014-2016-cı illərin tələbat dinamikasını müəyyənləşdirmək üçün Rusiyanın müstəqil səyyahları arasında təhlil aparıb. Aparılan təhlilə əsasən əldə edilən göstəricilərin 2017-ci ildə də eyni olacağı gözlənir.
Son iki ildə Rusiyada rublun kursu və iqtisadi vəziyyətlə əlaqədar olaraq keçmiş potsovet ölkələrində - Qazaxıstan (2016-cı ildə 4 % artım), Gürcüstan (61 % artım) və Azərbaycan (32 % artım) üzrə səyyar turizmdə artım müşahidə edilir.
"Momondo"nun Rusiyadakı təmsilçisi İrina Ryabova bildirib ki, rus səyyar turistlər üçün adıçəkilən ölkələr büdcə istiqamətlidir: "Hazırda sözügedən ölkələrdə turizm sektoru inkişaf edir. Bu baxımdan yuxarıda qeyd edilən ölkələr 2017-ci ildə də səyyar turistlərin səfər edəcəyi trend istiqamətlər olmağa davam edəcək. Məsələn, bu il Qazaxıstanda 2020-ci ilə qədər turizm sahəsinin inkişaf etdirilməsi proqramının ikinci mərhələsinin həyata keçirilməsinə başlanacaq. Eyni zamanda, bu il müxtəlif aviaşirkətlərin cəlb edilməsi üçün ölkə "açıq səma" rejiminə keçəcək. "Financial Times"in versiyasına görə, Özbəkistan bu günlərdə 2017-ci ildə ən çox səfər ediləcək ikinci ölkə adını alıb".
Turizm sahəsi üzrə ekspert Ruslan Quliyev "Bakı-Xəbər"ə açıqlamasında qeyd etdi ki, bir neçə il bundan öncə Azərbaycana MDB və digər ölkələrdən turistlərin cəlb olunması istiqamətində görülən işlər artıq öz bəhrəsini verir: "Bunu tək yerli vətəndaşlar deyil, xarici ölkə təşkilatları, nümayəndəlikləri, mediaları da təsdiq edir. Hətta 2017-ci il Azərbaycan üçün turist axını ili kimi proqnozlaşdırılıb".
Həmsöhbətimizin sözlərinə görə, ölkə başçısı İlham Əliyev tərəfindən təsdiq olunan "Strateji Yol Xəritəsi"ndə turizm inkişaf perspektivləri qeyd olunub: "Turpaketlərin dünya bazarına çıxarılması zamanı əsas önəmli məsələ məhsulun maya dəyərinə təsir edən amillərin aradan qaldırılması və rəqabət qabiliyyətli məhsulların təqdim olunmasıdır. Çeşidli xidmətlər, otellərin sayının artırılması, ixtisaslı kadrların sayının yetərincə olması və infrastrukturun inkişafı istiqamətində görülən işlər önəmlidir. Həmçinin marketinq işlərinin ardıcıl şəkildə aparılması turizm sektorunun inkişafına təsir edir".
R.Quliyevin sözlərinə görə, qarşıya qoyulan məqsəd 2025-ci ilə qədər Azərbaycanı turizm ölkəsi kimi tanıtmaq, 2025-ci ildən sonra dünyada ilk iyirmilikdə yer almaqdır.
Günel CƏLİLOVA
