"Bunlar qətiyyən yolverilməzdir"
Məlum olduğu kimi, Milli Məclisin Səhiyyə komitəsinin iclası keçirilib. İclasda komitənin ötən payız sessiyasında gördüyü işlər haqqında danışılıb və yaz sessiyasının iş planı təsdiq edilib. Görülən işlər haqqında məlumat verən komitə sədri Əhliman Əmiraslanov bildirib ki, komitə ötən payız sessiyasında səmərəli fəaliyyət göstərib.
Ə.Əmiraslanov reseptsiz satılan dərmanların reklamı haqqında məsələni bir daha gündəmə gətirib: "Azərbaycanda həkim resepti olmadan dərmanların geniş reklam olunmasının tərəfdarı deyiləm. Həkim resepti olmadan verilən dərmanların düzgün təyin edilmədən, doğru dozada müəyyən edilmədən qəbulu sonra ciddi fəsadlara gətirib çıxarır. Bəzən kimsə reklamda dərmana baxır deyir ki, bu patoloji əlamətdən məndə də var. Dərmanı alıb qəbul edir. Amma sonra məlum olur ki, həmin dərman ona uyğun deyil və sonra xəstənin müalicəsi daha da çətinləşir".
Həqiqətən də bu problem var və bununla bağlı qanunla müəyyən məhdudiyyətlərin tətbiq edilməsinə ehtiyac var. Düzdür, Azərbaycanda reklamı qadağan olunan əmtəələrin siyahısında həkim resepti əsasında buraxılan dərman vasitələri də var. Ancaq buna baxmayaraq, efirdə biz yenə də dərman reklamlarını görürük. O baxımdan ekspertlərin məsələyə münasibəti necədir?
Sözügedən məsələni dəyərləndirən tibb elmləri doktoru, professor Adil Qeybulla hesab edir ki, bununla bağlı müəyyən tədbirlərin görülməsinə ehtiyac var: "Dünya təcrübəsində dərman maddələrinin reklamı qadağandır. Reklam əmtəənin satışını stimullaşdırmaq üçündür. Dərman maddəsi isə satış üçün hesablanan əmtəə deyil. Bu yalnız həkim təyinatı əsasında buraxılır. Dərmanın təyinatı isə həkimə həvalə edilməlidir. Çünki bu ixtisasi oxuyub, həmin dərmanın tərkibi, orqanizmə təsiri və digər məsələləri elmi cəhətdən bilir və təyin edir. Dərman hansısa şou aparıcıları vasitəsilə, yaxud hansısa lövhələrdə reklam oluna bilməz. Bu, dünyanın hər yerində belədir. İstər dərmanlar, istər dərman əlavələri, istərsə də qida əlavələri və s. hamısı buraya daxildir. Hesab edirəm ki, Azərbaycanda da bu praktika tətbiq olunmalıdır. Bizim televiziya ekranlarında müxtəlif dərmanlar reklam edilir. Bunlar isə qətiyyən yolverilməzdir. İngiltərədə reseptsiz satılan dərmanlar parasetamol və qeyri-stereoid ağrıkəsicilər, aspirin və sairdir. Bunlar marketlərdə də satıla bilər. Amma yenə o dərmanların reklamına icazə yoxdur. Dərmanın təyinatı ixtiyarı müstəsna olaraq həkimə verilməlidir. Dərman reklamı da birmənalı olaraq qadağan edilməlidir. Bizim apteklərdə isə istənilən dərmanı reseptsiz almaq mümkündür. Amma bu yolverilməz haldır".
Vidadi ORDAHALLI
