Nəsimi Rayon İcra Hakimiyyəti 20 Yanvar faciəsinin növbəti ildönümü ilə əlaqədar silsilə tədbirlərə start verib. Tədbirlər planına uyğun olaraq rayonun ali və orta təhsil müəssisələrində, idarə və təşkilatlarında anım tədbirləri təşkil olunub. Orta məktəblərin foyelərində Qanlı Yanvar faciəsinin XXVII ildönümü ilə əlaqədar foto stendlər düzəldilib, anım mərasimləri, yığıncaqlar, toplantılar, inşa yazıları, rəsm, şer müsabiqələri keçirilir, divar qəzetləri buraxılır. Rayonun idarə və təşkilatlarının kollektivlərinin, orta və ali təhsil müəssisələrinin şagird və tələbələrinin «Şəhidlər Xiyabanı»na ziyarəti təşkil olunur.
Nəsimi RİH-dən baki-xeber.com-a verilən xəbərə görə, yanvarın 17-də isə Rayon İcra Hakimiyyətində “20 Yanvar” cəmiyyəti, rayonun ictimai təşkilatlarının nümayəndələrinin iştirakı ilə rayonda yaşayan 20 Yanvar şəhidlərinin ailələri və faciə zamanı əlil olmuş rayon sakinləri ilə görüş keçirilib. Tədbirdə çıxış edən Nəsimi rayon İcra Hakimiyyətinin başçısı Asif Əsgərov qeyd edib ki, 20 Yanvar hadisəsi xalqımızın tarixinə həkk olunmuş ən qanlı faciələrdəndir. 20 Yanvar günlərini xatırlayan Asif Əsgərov bildirib ki, 1990-cı ilin yanvar qırğını nə qədər faciəli olsa da, Azərbaycan xalqının iradəsini, milli azadlıq uğrunda mübarizə əzmini qıra bilmədi. Həmin müdhiş gecədə həlak olan vətən oğulları Azərbaycanın tarixinə parlaq səhifə yazdılar, xalqın milli azadlığı, müstəqilliyi üçün yol açdılar. Bu gün müstəqil Azərbaycan dövlətinin tarixinə qanlı 20 Yanvar faciəsi xalqımızın şərəf və qəhrəmanlıq səhifəsi kimi düşüb.
Tədbirdə faciə qurbanlarının ailələrinin və 20 Yanvar əlillərinin, dövlətimizin ərazi bütövlüyü uğrunda həlak olmuş şəhid ailələrinin dövlət tərəfindən hər cür diqqət və qayğı ilə əhatə olunduğu, onlara Prezident İlham Əliyevin və Heydər Əliyev Fondunun prezidenti Mehriban Əliyevanın diqqət və qayğısı xüsusi qeyd edilib.
Sonra Nəsimi RİH başçısı Asif Əsgərov şəhid ailələri və 20 Yanvar əlillərinin məişət qayğıları və problemləri ilə maraqlanaraq, bir çox sualların həlli ilə bağlı müvafiq tapşırıqlar verib.
Görüşdə “20 Yanvar” cəmiyyətinin sədri Sultan Əzimzadə, Nəsimi rayon Ağbirçəklər Şurasının sədri Zərifə Quliyeva, 20 Yanvar Nəsimi rayon təşkilatının sədri, II qrup əlil Tofiq Allahverdiyev çıxış edərək şəhid ailələri və əlillər adından onlara olan diqqət və qayğıya görə ölkə başçısı İlham Əliyevə minnətdarlıqlarını bildiriblər.
Tədbirin sonunda 20 Yanvar faciəsi qurbanlarının ailələrinə və əlillərə maddi yardım göstərilib.
Baki-xeber.com
