Adil Qeybulla: "Qrip virusları artıq hər il yayılır və fərqli şəkildə özünü göstərir"
Son aylar ölkə əhalisi arasında sürətlə yayılan qrip virusu ciddi təşviş yaradıb. Əhali arasında yayılan söz-söhbətdə qrip virusunun təhlükəli olduğu bildirilir. Ancaq Səhiyyə Nazirliyi bunun doğru olmadığını bildirir.
Səhiyyə Nazirliyi (SN) Gigiyena və Epidemiologiya Mərkəzinin yaydığı məlumatda qeyd olunur ki, bu il Azərbaycanda kəskin respirator infeksiyalara yoluxanların sayı ötən ilin yanvar-fevral aylarına nisbətən 2 dəfə azdır. Mərkəzin direktor müavini Afaq Əliyeva media nümayəndələrinə açıqlamasında deyib ki, keçən il xəstələnmə halları bu ildəkindən 2 dəfə çox idi: "Amma indi ötən ilin yanvar-fevral aylarına nisbətən azalma var. Laborator müayinələr zamanı da xəstələrdə bir o qədər viruslar aşkarlanmır. Xəstələrin əksəriyyəti xəstəliyi yüngül keçirir. Ağırlaşma o zaman olur ki, xəstə yataq rejiminə riayət etmir, həkimə müraciət etmir, kiminsə məsləhəti ilə dərmanlar qəbul edir, yəni düzgün müalicə olunmur. Belə hallarda insanlarda bronxit əlamətləri müşahidə edilir və digər ağırlaşmalar olur. Ancaq xəstə ilkin əlamətləri görən kimi həkimə müraciət edirsə, o, xəstəliyi çox yüngül keçirir. Eyni zamanda, ətrafdakıların da xəstəliyə yoluxmasının qarşısı alınır".
RGEM rəsmisi əlavə edib ki, bu payız-qış mövsümündə qeydə alınan kəskin respirator virus infeksiyaları epidemik həddi keçməyib. Yəni hazırda ölkədə kəskin respirator infeksiyalara yoluxma səviyyəsi mövsümə uyğundur.
A.Əliyeva qeyd edib ki, hazırda xəstələnmə halları epidemik həddən iki dəfədən çox aşağıdır.
Professor, tibbi ekspert Adil Qeybulla da xəstəliyin ötən illə müqayisədə artmadığını bizimlə söhbətində dilə gətirdi. Onun sözlərinə görə, kəskin respirator infeksiyalara yoluxanların qeydiyyatı aparılmır: "Ümumiyyətlə, əhalinin kəskin respirator infeksiyalara münasibəti adekvat deyil. Biz qripi ayaq üstə keçiririk. Ona görə də bəzən ağırlaşma halları qeydə alınır. Ola bilsin ki, ağ ciyər patalogiyasında ölüm halı baş versin. Ancaq bu rəsmi təsbit olunmalıdır. Müşahidələr göstərir ki, son zamanlar əhali arasında qrip daha çox müşahidə olunur. Bu qripin kəskin formada olması rəsmən təsdiq olunmayıb".
Həmsöhbətimizin fikrincə, insanların qrip virusuna yoluxmaması üçün KİV-in üzərinə böyük yük düşür: "Televiziya verilişlərində əhalinin bu cür infeksiyalardan necə qorunması haqqında mütəmadi məlumatlar verilməlidir. Virusun yayılmasının qarşısını almaq üçün lokal tədbirlər görülməlidir. Maarifləndirici tədbirlər olmalıdır".
A.Qeybulla onu da qeyd etdi ki, qrip virusları artıq hər il yayılır və fərqli şəkildə özünü göstərir: "Əhali arasında yeni yayılan virusun H3N2 olması haqqında məlumatlar dolaşır. Virusun H3N2 olması hələ dəqiq deyil, ancaq ehtimal olunur".
Günel CƏLİLOVA
