Ağa Seyidli: "Təəssüflər olsun ki, bizdə artıq Həcc ziyarətini bir prestijə çeviriblər"
Əvvəllər Həcc və ya Ümrə ziyarətində olmuş Özbəkistan vətəndaşları indi bu ziyarətləri təkrarlaya bilməyəcək. 2017-ci ildən etibarən Həcc və Ümrə ziyarətinə yalnız heç vaxt zəvvar olmamış şəxslər gedəcək. Bu qərar Nazirlər Kabineti yanında Dini İşlər üzrə Komitə tərəfindən qəbul edilib. İstisna yalnız Məkkə və Mədinəyə xidməti ezamiyyətə gedən və müqəddəs yerlərə ziyarətləri təşkil edən vəzifəli şəxslərə aiddir.
Xatırladaq ki, Özbəkistanın Həcc kvotası ən azı 25 min nəfərdir. Lakin Özbəkistan hökuməti hər il zəvvarların sayını beş min nəfərlə məhdudlaşdırır. 2017-ci ildə Ümrə ziyarətinə 6 min zəvvar yola düşəcək.
Maraqlıdır ki, bu məlumatın yayılmasından sonra Azərbaycanda da Həcclə bağlı yeniliyin tətbiq olunacağı açıqlandı. Bildirilir ki, Azərbaycandan bu il ikinci dəfə və daha çox Həcc ziyarətinə gedəcək zəvvarlar əlavə ödənişlər ödəyəcək.
Səudiyyə Ərəbistanı Həcc Nazirliyi tərəfindən qoyulan qaydaya əsasən, bir dəfədən çox Ümrə ziyarətinə gedənlər üçün əlavə ödənişlər ləğv edilsə də, Həcc üçün qüvvədə saxlanıb.
Ötən ilin sentyabr ayında Səudiyyə Ərəbistanı Krallığı Həcc və Ümrə ziyarətinə bir dəfədən çox gedənlərin əlavə 500 dollar ödəniş etməli olduqları barədə qərar qəbul etsə də, sonradan bu qayda Ümrə ziyarəti üçün ləğv olunub.
Qaydalara əsasən, Azərbaycandan bu ildən etibarən ikinci dəfə Həccə gedənlər 500 ABŞ dolları, üçüncü dəfə və ondan çox gedənlər isə 550 dollar əlavə ödəniş etməli olacaq.
Artıq Qafqaz Müsəlmanları İdarəsinin (QMİ) builki Həcc mövsümü ilə bağlı təşkilati işləri həyata keçirən nümayəndə qrupu Səudiyyə Ərəbistanına yola düşüb. O da bildirilir ki, ötən illə müqayisədə bu il Həcc ziyarətinin qiymətində artım olacaq. Buna səbəb dolların kəskin bahalaşmasıdır.
Qeyd edək ki, ötənilki Həcc ziyarəti zamanı daha yaxşı şəraitli otellərdə qalmaq, bahalı yeməklərlə təminat, o cümlədən otellərdə 4 nəfərlik otaqlarda yerləşmək 4500 dollar, nisbətən ucuz şəraitli, 6 nəfərlik otaqlarda qalmaq isə 3500 dollar olub.
Azərbaycanda Həcc ziyarətinə dair sənədləşməni yalnız QMİ həyata keçirir.
Həcc ziyarətinə bir dəfədən artıq getmək üçün əlavə rüsum ödəməkdənsə, Özbəkistan praktikasından yararlanmaq olmazmı?
Ekspert Ağa Seyidli qəzetimizə açıqlamasında bildirdi ki, İslam dinində Həcc ziyarəti vacib əməl sayılır: "Ancaq ziyarətə hansı hallarda getməyin mümkünlüyü ilə də bağlı incəliklər mövcuddur. Ziyarət üçün sərf olunan vəsit halal yolla qazanılmalıdır. Hətta belə bir incəlik də var ki, qonşusunda ac olan adamın Həccə getməsi məqbul deyil. Təəssüflər olsun ki, bizdə artıq Həcc ziyarətini bir prestijə çeviriblər. Dində Həcc ziyarətinə çox getməklə bağlı qadağa olmasa da, insanın özündə də bir ədalət hissi olmalıdır. Hesab edirəm ki, Həcc rekordunu qırmaq istəyənlər daha böyük savab qazana bilər. O qədər Həcc ziyarəti etməyə layiq olan, lakin buna imkanı çatmayan həqiqi dindarlar var ki, heç olmasa onları müqəddəs ziyarətə göndərməklə savab qazana bilərlər. Yaxşı olar ki, bundan yararlansınlar. Özbəkistan bu addımı Səudiyyə Ərəbistanının kvotanı azaltmasından sonra atdı. Hər dəfə kvota azalanda qiymət artımı baş verir. Azərbaycanda isə əlavə ziyarət üçün pul ödəməli olacaqsan. Hesab edirəm ki, bu, maarifləndirməyə bağlı olan məsələdir. Belə vasitələr fayda verməyəndə inzibati tənzimləmə metodları pis deyil".
Məhəmmədəli QƏRİBLİ
