"Bəzi televiziya layihələri var ki, onlar haqqında artıq uzun müddətdir mətbuatda, ictimaiyyətdə xoş olmayan məlumatlar yayılır"
"Doğrudur, əvvəlki illərlə müqayisədə Azərbaycan efirində şou xarakterli verilişlər azalıb. Verilişlərin biçimində də müəyyən dəyişikliklər hiss olunur. Amma təəssüflə onu da bildiririk ki, hələ də şou xarakterli verilişlərdə bayağılıq, sosial problemli insanların üzərində şou yaratmaq halları qalır. Bu bizi də çox narahat edir".
Bunu mətbuata açıqlamasında Milli Televiziya və Radio Şurasının sədri Nuşirəvan Məhərrəmli bildirib. Onun sözlərinə görə, özəl televiziya kanalları öz fəaliyyətində daha çox məhz kommersiya maraqlarını əsas götürür: "Reklam bazarındakı duruma baxdıqda vəziyyətin o qədər də ürəkaçan olmadığını görürük. Bildiyiniz kimi, qonşu Türkiyə və Rusiyanın televiziya kanalları kabel şəbəkəsi vasitəsilə Azərbaycanda sərbəst şəkildə yayımlanır. Yəni Azərbaycan televiziya kanalları çox ciddi rəqabət mühitindədir. Bu amil isə sözsüz ki, verilişlərin keyfiyyətinə də təsir edir".
O bildirib ki, MTRŞ televiziya kanallarının yaradıcılıq işinə, proqram siyasətinə, kadr və maliyyə məsələlərinə qarışmır: "Tamaşaçılar isə hər bir məsələdə bu işin həllini bizim üzərimizə atır. Yaxşı olar insanlar, o cümlədən jurnalistlər Milli Televiziya və Radio Şurasından gözləntilərini qanuna uyğunlaşdırsınlar. Əgər hər şeyi Şuradan gözləyirlərsə, ilk olaraq, bunun hüquqa söykənib-söykənmədiyini müəyyənləşdirsinlər. Biz bu məsələləri yayımçılarla birgə həll etməyə çox çalışırıq".
Müşahidələr göstərir ki, telekanallarda sosial problemli insanların üzərində şou yaratmaq halları tez-tez baş verir. Bu da cəmiyyətdə birmənalı qarşılanmır. O üzdən sözügedən problem necə həll edilməlidir?
Məsələyə münasibət bildirən "Xalq Cəbhəsi" qəzetinin baş redaktoru Elçin Mirzəbəylinin sözlərinə görə, təkcə ictimai qınaqla sözügedən problemləri həll etmək mümkün deyil: "O aspektdən də indiki şəraitdə çıxış yolu MTRŞ-yə əlavə səlahiyyətlərin verilməsindən keçir. Türkiyədə radio-televiziya qurumu var. Sözügedən qurum müvafiq sanksiyalar tətbiq etmək hüququna malikdir. Lazım gələrsə, televiziyanın və yaxud da konkret verilişin yayımını dayandırmaq hüququna malikdir. Eyni zamanda, cərimə sanksiyaları tətbiq edə bilir. Deməyim odur ki, belə halların qarşısının alınmasında anında qərar vermək səlahiyyətinə malikdir. Elə bir veriliş gedə bilər ki, orada çox ciddi problemlər ortaya çıxa bilər. Sosial çağırışlar və ümumiyyətlə ictimai rəyə mənfi təsir göstərən amillər ortaya çıxa bilər. Həmin zaman MTRŞ-da müddəti gözləmədən qərar vermək hüququ olmalıdır. Ona görə də indiki şəraitdə çıxış yolunu yalnız bunda görürəm. Reallıq ondan ibarətdir ki, ictimai qınaq effekt vermir. Bəzi televiziya layihələri var ki, onlar haqqında artıq uzun müddətdir mətbuatda, ictimaiyyətdə xoş olmayan məlumatlar yayılır. Müxtəlif fikirlər səslənir, əhali etiraz edir, amma həmin verilişlərin yayımı davam etdirilir".
Vidadi ORDAHALLI
