Bahadur Bilalov: "Qatar həm çox sayda turist daşıya bildiyindən, həm də turistlərə müxtəlif yerlərə ekskursiya imkanı verdiyindən, turizmin bu növünü ölkəmizdə inkişaf etdirmək sərfəlidir"
Ölkəmizdə müxtəlif tədbirlərin, o cümlədən beynəlxalq idman yarışlarının keçirilməsində əsas məqsəd ilk növbədə özümüzü və məmləkətimizi dünyaya tanıtmaq olsa da, bütün bunlardan həm də iqtisadiyyatın inkişafı üçün töhfə əldə olunur. Odur ki, bu istiqamətdə həyata keçirilən bütün növ təbliğati və təşkilati tədbirlərin böyük siyasi və iqtisadi əhəmiyyəti var.
Bu gün ölkəmizə çoxlu sayda turist gəlir. Turistlər adətən hava nəqliyyatı yolundan istifadə edərək Azərbaycana səfər edir. Ancaq elə turistlər var ki, onlar daha uzun zaman çərçivəsində qatar nəqliyyatından istifadə etməyi xoşlayır.
Azərbaycan Turizm Assosiasiyası (ATA) sədrinin müşaviri, ATA-nın baş katibi Müzəffər Ağakərimov media nümayəndələrinə açıqlamasında deyib ki, biz qatar turizminin imkanlarından geniş istifadə etməliyik: "Avropaya çıxış üçün Azərbaycan-Gürcüstan-Türkiyə, cənub istiqamətində Azərbaycan-İran, şimal istiqamətində isə Azərbaycan-Rusiya qatar turizmini də inkişaf etdirməliyik. Axı təyyarə və avtobusların sərnişin tutumu çox deyil. Amma qatar turizmi həm kütləviliyi təmin edər, həm də ucuz başa gəldiyi üçün tələbələrdən tutmuş, aztəminatlı insanlar üçün əlverişli olar".
Qatar turizminin əhəmiyyətindən danışan turizm sahəsi üzrə mütəxəssis Bahadur Bilalov "Bakı-Xəbər"ə açıqlamasında qeyd etdi ki, bunun vasitəsilə ölkəyə çoxlu turist cəlb etmək olar: "İstənilən nəqliyyat vasitəsilə ölkəyə turist cəlb etmək olar. O cümlədən dəmir yolu vasitəsilə ölkəyə turist gələ bilər. Bakı-Axalkalaki-Qars dəmir yolu açılandan sonra bu sahədə dəyişiklik hiss olunacaq. Bu istiqamətdə dəmir yolu xətti istifadəyə verildikdən sonra həm ölkəyə gələn turistlərin sayı artacaq, həm də Avropaya getmək istəyən yerli vətəndaşlar ucuz nəqliyyat vasitəsindən istifadə etməklə, istədikləri bölgəyə səfər edə bilər. Təbii ki, əks istiqamətdə mühüm dəyişiklik gözlənir".
Həmsöhbətimizin sözlərinə görə, qatar həm çox sayda turist daşıya bildiyindən, həm də turistlərə müxtəlif yerlərə ekskursiya imkanı verdiyindən, turizmin bu növünü ölkəmizdə inkişaf etdirmək sərfəlidir.
Günel CƏLİLOVA
