"Tək rus dili bölməsində deyil, Azərbaycan bölməsinin dərsliklərində də uşaq psixologiyasına mənfi təsir göstərən mövzular yer alır"
Kitab cəmiyyətin inkişafında müstəsna rol oynayır. Ancaq zaman-zaman orta məktəb dərsliklərində səhvlər aşkarlanır. Bu isə təhsil prosesində böyük problemlərdən biridir. Çünki ən azı 2 tədris ilinin şagirdləri bu kitablardan istifadə etməyə məcbur olur.
Dəfələrlə sosial şəbəkələrdə dərsliklərdə aşkar olunan qüsurlar nümayiş olunub və reaksiyalar da səsləndirilib.
Növbəti belə bir qüsur orta məktəbin rus bölməsi üçün nəşr edilən kitabda qeydə alınıb. Belə ki, rus bölməsinin VI sinif üçün fizika kitabında şagirdlərə belə bir sual verilib: "Qız qalasının hündürlüyü 28 metrdir. Bu hündürlükdən aşağı atılan bədən neçə dəqiqəyə yerə düşər?"
Sualın qoyuluşu birmənalı qarşılanmır. Bununla da 11-12 yaşlı uşaqda hündürlükdən insanın özünü atması fikri formalaşır. Məsələ ilə bağlı fikir bildirən Azad Müəllimlər Birliyinin rəhbəri Məlahət Mürşüdlü "Bakı-Xəbər"ə açıqlamasında qeyd etdi ki, dərslikdə uşağın psixologiyasına mənfi təsir edə bilən mövzular yer almamalıdır: "Kitabda qeyd olunan sual, bir növ, uşaqları intihara vadar edir. Hər bir düşüncədə olan uşaq var. Uşaqlar nə eşitdiklərini canlı görmək istəyir. Belə mövzu ilə tanış olan uşaq oxuduğunu əyani görmək istəsə, o zaman faciələr baş verə bilər".
M.Mürşüdlünün sözlərinə görə, dərsliklərə salınan mövzular, suallar şagirdlərin mənəviyyatına müsbət təsir göstərməlidir: "Kitablarda elə mövzular yer almalıdır ki, uşaqlar onunla tanış olduqdan sonra yaşadığı dövləti sevsin, böyüklərə hörmətlə yanaşsın. Yoxsa kitabda qeyd olunan məntiqsiz suallarla onları çaşdırmamalıyıq. Mən sizə deyim ki, tək rus dili bölməsində deyil, Azərbaycan bölməsinin dərsliklərində də uşaq psixologiyasına mənfi təsir göstərən mövzular yer alır. Metodistlər həmin mənfi xarakterli mövzuların şagirdlərin psixologiyasına təsir göstərməməsi üçün əllərindən gələni edir".
Həmsöhbətimiz təklif edir ki, dərsliklər hazırlanan zaman ictimai müzakirəyə çıxarılsın: "Ola bilər ki, dərsliyi tərtib edənin gözündən hansısa səhv yayınsın. Ancaq ictimai müzakirəyə çıxarılsa, dərsliklərdəki bütün qüsurlar tapılar və müvafiq tədbir görülər".
Günel CƏLİLOVA
