Adil Qeybulla: "Həkim etikası kodeksi yaradılmalıdır"
Səhlənkar həkimlərə bəd xəbər, onlar pasiyentlərin hüquqlarını pozduğu təqdirdə cəzalandırılacaq. Çünki Milli Məclisdə "Pasiyentlərin hüquqları haqqında" qanun layihəsi hazırlanır. Qanun layihəsi pasiyent üçün pozulmuş hüquqların bərpasını və işində səhlənkarlığa yol vermiş həkimlərin cəzalanmasını diqtə edir.
Milli Məclisin Səhiyyə komitəsinin üzvü Musa Quliyev media nümayəndələrinə açıqlamasında deyib ki, artıq icbari tibbi sığortanın tətbiqinə start verilib: "Azərbaycanda "Pasiyentlərin hüquqlarının qorunması haqqında" yeni qanun layihəsi hazırlana bilər. Bu qanun da icbari tibbi sığorta ilə sıx bağlı olacaq bir qanundur. Hesab edirəm ki, biz komitə olaraq yaz sessiyasında bunun da üzərində işlərə başlaya bilərik".
Məsələyə dair fikir bildirən professor, tibbi ekspert Adil Qeybulla "Bakı-Xəbər"ə açıqlamasında qeyd etdi ki, hər bir ölkədə həkim etikası kodeksi var: "Həkim etikası kodeksi o deməkdir ki, həkimlə xəstə arasında münasibətləri tənzimləyən qanunvericilik aktıdır. Bu, hüquqi məsuliyyət yaradan bir sənəddir. Hipokrat andının isə belə bir hüquqi imkanı yoxdur. Sadəcə olaraq pasiyentlərin hüquqlarının müdafiəsi haqqında qanun məsələyə birtərəfli yanaşmadır.
Zənnimcə, məsələ sistemli şəkildə həll olunmalıdır. Dövlət həkimə tibb diplomu verirsə, təbii ki, onun arxasında durur.
Hansısa həkim səhvi və ya xəstəliyin ağırlaşması ilə bağlı xəstəyə ziyan dəyibsə, bu tip problemləri tibbi komissiya araşdırır. Bu qayda dünyanın hər bir yerində belədir. Bizdə isə qeyri-tibb orqanları araşdırır. Təklif edirəm ki, biz də dünyanın getdiyi yolnan hərəkət edək. Bu sınanmış yoldur".
Həmsöhbətimiz bildirdi ki, həkim etikası kodeksi yaradılmalıdır. Həkimin və xəstələrin vəzifə səlahiyyətləri həmin sənəddə göstərilməlidir: "Ola bilər ki, xəstə müalicədən sonra tətbiq olunan rejimə əməl etmir. Belə olanda xəstənin səhhətində ağırlaşma yaşanır. Belə vəziyyətdə məsuliyyəti kim daşımalıdır? Bu tibbi məsələləri tibbi komissiya araşdıraraq ona uyğun qərar verir. Daha yaxşı olar ki, tək xəstənin yox, eyni zamanda həkimlərin də hüquqlarını qoruyan qanun hazırlanıb qəbul olunsun. Təklif olunan qanun layihəsində yalnız xəstələrin hüquqları təmin olunacaqsa, o zaman həkimlərin ağır xəstələrdən uzaqlaşmasına səbəb ola bilər. Həkimlər ağır xəstələrin müalicəsinə səy göstərməyəcək, çünki sabahısı gün xoşagəlməz hadisə baş versə, məsuliyyət həkimin üzərində qalacaq. Təklif olunan qanun layihəsi kənardan yaxşı görünə bilər. Ancaq ümumi kontekstdən baxanda onun mənfiləri daha çox nəzərə çarpır".
Günel CƏLİLOVA
