Mahir Hümbətov: "Yerli turistlərin rahat şəkildə ovçuluqla məşğul olması üçün onlara verilən icazə qaydası yüngülləşdirilməlidir ki, bu sahədən daha çox gəlir əldə olunsun"
Azərbaycan ovçuluq turizmi üçün əlverişli ölkələrdən biri hesab olunur. Qafqaz dağlarında müxtəlif növ heyvanların məskunlaşması qış fəslində ovçuların ova marağını daha da artırır.
Mütəxəssislərin fikrincə, ölkəmizin ərazisi ovçuluq turizmindən külli miqdarda gəlir götürmək üçün münbit imkanlara malik olsa da, bu potensialdan lazımi qədər istifadə olunmur.
Azərbaycanın təbii-coğrafi mövqeyi və zəngin tarixi burada turizmin bütün növlərinin inkişafı üçün əlverişli şərait yaradır. Ekspertlərin bildirdiyinə görə, hazırda ovçuluq turizminin inkişafı üçün ölkəmizdə kifayət qədər potensial var. Turizmin bu növü bütün dünyada çox gəlirli biznes kimi qəbul edilir.
Qeyd edək ki, bəzi heyvan və quşların ovlanması Azərbaycanın mövcud qanunları ilə qadağandır, bəzilərinə isə xüsusi lisenziya ilə icazə verilir.
Bir sıra regionlar var ki, orada ovçuluq turizmini inkişaf etdirmək olar. Bu siyahıya Lənkəran, İsmayıllı, Qax və digər əraziləri aid etmək olar. Bu bölgələrdə ovçuluq turizminin inkişaf etməsi üçün müəyyən şəraitin yaradılması ovçular tərəfindən təklif olunur.
Ovçuluq sahəsi üzrə ekspert Mahir Hümbətov bizimlə söhbətində bildirdi ki, ovçuluq turizminin Azərbaycanda geniş coğrafiyası var. Ölkəmizdə həm düzənlik, həm də dağlıq ərazilərdə turizmin bu növünün inkişafı mümkündür: "Qeyd edim ki, bir neçə il əvvəl "quş qripi" ilə əlaqədar quş ovuna qoyulan qadağanın hələ də qüvvədə qalması bütün yerli ovçularda narahatlıq yaradır. Ov həvəskarları üçün nə qədər əlverişli şərait yaradılarsa, bu turizm növünün inkişafına bir o qədər böyük zəmin yaranar. Çünki ovçuluqla təkcə yerli əhali deyil, ölkəmizə səfərə gələn xarici vətəndaşlar da çox maraqlanır. Əcnəbi turistlər ovçuluq sahəsinə meyl edir. Ancaq onlar bu işlə məşğul olması üçün xüsusi lisenziya almalıdır".
Həmsöhbətimizin sözlərinə görə, ovçuluq turizminin inkişafı üçün müəyyən şərait yaradılmalıdır: "Düzdür, bəzi bölgələrdə ovçuların yaşayışı üçün otel tikilir. Artıq ovçuluqla məşğul olanlar dağətəyi ərazilərdə fərdi şəkildə deyil, oteldə rahat qala biləcək. Yerli turistlər bu sahə ilə məşğul olmaq istəyir. Onlar bu işə xobbi kimi yanaşır. Yerli turistlərin rahat şəkildə ovçuluqla məşğul olması üçün onlara verilən icazə qaydası yüngülləşdirilməlidir. Belə olarsa, bu sahədən daha çox gəlir əldə etmək olar".
Günel CƏLİLOVA
