Rasif Bağırov: "Belə sürücülər səhiyyə mədəniyyətindən xəbərsizdir"
Bakıda təcili yardım maşınlarına yol verməyən sürücülər cəzalandırıla bilər. Bakı Şəhər Təcili və Təxirəsalınmaz Tibbi Yardım Stansiyası baş həkiminin operativ və hospital işləri üzrə müavini Murad Mirzəzadə media nümayəndələrinə açıqlamasında bildirib ki, bəzən yollarda digər maşınlar tərəfindən təcili yardıma yol verilməməsi çağırış yerlərinə yubanmaya səbəb olur.
Onun sözlərinə görə, bu halları nəzərə alaraq təcili yardım stansiyası tərəfindən müvafiq təkliflər hazırlanaraq Səhiyyə Nazirliyinə və Bakı Şəhər Baş Polis İdarəsinə göndərilib: "Təkliflərdə təcili yardım maşınlarının önünə və salonuna kameranın quraşdırılması əks olunub. Təcili yardım maşınlarının önünə quraşdırılan kameranın onlayn rejimdə işləməsi, zəruri və ehtiyac yarandığı halda təcili yardım maşınına yol verməyən maşının nömrəsinin qeydə alınaraq Bakı Şəhər Baş Polis İdarəsinə göndərilməsi təkliflərdə qeyd olunub. Bundan sonra polis tərəfindən həmin sürücülərə qarşı hansısa tədbirlər görülə bilər. Ancaq hansı cəza və ya xəbərdarlığın olması sonradan müvafiq qurum tərəfindən müəyyənləşəcək".
Baş həkimin müavini vurğulayıb ki, təcili yardım maşınları üçün əlavə zolaqların salınması müvafiq qurumlar tərəfindən həyata keçirilə bilər: "Bu səlahiyyətlər təcili yardım stansiyasına aid deyil".
Təcili yardım maşınlarına yol verməyən sürücülərin cəzalandırılması təklifi ekspertlər tərəfindən də müsbət qarşılanır.
Qeyd edək ki, əksər xarici ölkələrdə təcili yardım maşınları üçün xüsusi zolaqlar var. Həmin ölkələrdə təcili yardım maşınlarına yol verilir, o tip avtomobillərin digər nəqliyyat vasitələri kimi tıxaca düşməsinə şərait yaratmırlar.
Məsələ ilə bağlı fikir bildirən həkim-ekspert Rasif Bağırov "Bakı-Xəbər"ə açıqlamasında qeyd etdi ki, təcili tibbi yardım maşınlarına yol verməyən sürücülərin cəzalandırılması dövlət tərəfindən qəbul olunmuş qərardır: "Bu yeni məsələ deyil. Xəstə dalınca gedən maşına yol verməyən sürücü barəsində Bakı Şəhər Dövlət Yol Polisi İdarəsinə şikayət edildikdə həmin nəqliyyat vasitəsinə cəza olaraq 3 bal tətbiq olunurdu. Sadəcə, insanlıq baxımından təcili yardım maşınları heç bir sürücü barəsində şikayət etməyib. Bu günə qədər bununla bağlı bir dənə də olsun şikayət qeydə alınmayıb. Sürücülər bu haldan istifadə edirlər. Digər nəqliyyat vasitələrinin sürücüləri görəndə ki, onun arxasında təcili yardım maşını işıq yandıraraq gəlir, o zaman idarə etdiyi minik vasitəsini sağa çəkib yol verməlidir. Təcili tibbi yardım maşınının sürücüsü qırmızı və göy işığı yandırırsa, bu o deməkdir ki, həmin maşın təcili hansısa xəstənin üstünə gedir. Təcili tibbi yardım maşını geri qayıdan zaman həmin işıqlar söndürülür. İşığın yanmaması maşının boş və sakitlik olmasını göstərir.
Bəzən elə hal olur ki, təcili tibbi yardım maşınının sürücüsünün qırmızı və göy rəngli işığı yandırmasına baxmayaraq, qarşıdakı avtomobil ona yol vermir. Çarəsiz qalan təcili tibbi yardım maşınının sürücüsü qarşısındakından yol istəmək üçün gücləndirilmiş siqnal verir. Lakin bəzi sürücülər, heç nə olmamış kimi, öz yoluna davam edir. Bu hal bəzi sürücülərin səhiyyə mədəniyyətindən xəbərsiz olmasından irəli gəlir. Həkimlər özünə sığışdırmır ki, hansısa sürücü haqqında polis idarəsinə şikayət etsin. Təcili tibbi yardım maşınlarına kameranın quraşdırılması düzgün addım olardı. Təcili tibbi yardım maşınına yol verməyən sürücülərin cəzalandırılmasının tərəfdarıyam".
Günel CƏLİLOVA
