Şaiq Muradov: "Yeni bir axtarış sistemi yaratmaqdansa, "Google.az" ilə əməkdaşlıq etmək daha məqsədəuyğundur"
Xəbər verildiyi kimi, Azərbaycanın milli axtarış sistemi yaradılacaq. Azərbaycanın İT şirkətləri milli axtarış sisteminin yaradılmasına lazım olan köməkliyi etməyə hazırdır. Bu barədə "Trend"ə İT bazarındakı mənbə bildirib.
Milli axtarış sisteminin yaradılmasında əsas məqsəd ölkənin informasiya təhlükəsizliyini təmin etməkdir. Həmçinin reklamdan əldə olunan qazanc ölkə daxilində qalacaq.
Bildirilir ki, əvvəl milli axtarış sisteminin yaradılması "Dilmanc" layihəsi çərçivəsində aparılırdı.
"Global Stats" mərkəzinin məlumatına görə, Azərbaycanda ən populyar axtarış sistemi "Google"dir (94 %).
İKT sahəsi üzrə mütəxəssis Şaiq Muradov "Bakı-Xəbər"ə açıqlamasında qeyd etdi ki, milli axtarış sisteminin yaradılması optimal qərar deyil: "Axtarış sistemi deyərkən ilk olaraq insanın ağlına "Google" və "Yandeks" düşür. Bu axtarış sistemlərinin necə imkanlarının olması hər kəsə bəllidir. Milli axtarış sistemi yaradılmazdan öncə bu sahəyə külli miqdarda vəsait ayrılmalıdır. Həmçinin, bu işə peşəkarlar cəlb olunmalıdır".
Həmsöhbətimizin sözlərinə görə, bir neçə il öncə ölkədə "Yumru.az" adlı axtarış sistemi yaradıldı. Ancaq həmin axtarış sistemi uğursuz idi: "Növbəti bir uğursuz axtarış sisteminin yaradılmasının əleyhinəyəm. Hesab edirəm ki, yeni bir axtarış sistemi yaratmaqdansa, "Google.az" ilə əməkdaşlıq etmək daha məqsədəuyğun olar. Çünki Azərbaycan haqqında məlumat əldə etmək istəyən xaricilər, təbii ki, "Google"dan yararlanacaq. Xaricdə yaşayanlar Azərbaycanda yaradılacaq hansısa axtarış sistemindən xəbərsiz olacaq. Ən azından, 10 il lazımdır ki, yeni yaradılacaq axtarış saytı "Google" səviyyəsinə çatsın".
Ş.Muradovun fikrincə, "Google.az" axtarış sistemi optimallaşdırılmalıdır.
Günel CƏLİLOVA
