"Dünyanın aparıcı nəşrləri Azərbaycanı turizm marşrutları siyahısına daxil edibsə..."
Azərbaycan 2017-ci il üçün turizm marşrutları siyahısına daxil edilib. "The Sunday Times" portalının 2017-ci ildə turistlər üçün təklif etdiyi ölkələr sırasında Azərbaycan və Bakı haqqında ətraflı məlumat yerləşdirilib.
Xəbərdə bildirilir ki, Asiya və Avropa qovşağında yerləşən Azərbaycan Qərb və Şərq mədəniyyətlərini yaşadan bir ölkədir. Məlumatda ölkənin dekabr ayında Asiya üzrə ən çox ziyarət edilən istiqamətlər sırasında olduğu qeyd olunur. "Azərbaycanın populyarlığının artması turistlərin buradakı otellər, restoranlar və görməli yerlər haqqında müsbət rəyləri ilə müəyyən olunur. Turistlər arasında getdikcə bu ölkəyə maraq artır", - deyə məqalədə bildirilir.
Yazıda, həmçinin, İçərişəhər, Şirvanşahlar sarayı, Qız qalası, Azərbaycan mətbəxi haqqında məlumat verilir. Eyni zamanda, Bakının müasir memarlıq nümunələri ilə də zəngin olduğu vurğulanır, Heydər Əliyev Mərkəzi və "Flame Towers" barədə ətraflı bəhs edilir, Naftalan neftinin müalicəvi əhəmiyyətindən danışılır.
Onu da bildirək ki, siyahıya, həmçinin, Kanada, bəzi Afrika ölkələri, Portuqaliya, Peru, Braziliya, Ekvador, Hindistan, İrlandiya daxil edilib.
Azərbaycanın turizm marşrutları siyahısına daxil olunmasına fikir bildirən turizm sahəsi üzrə mütəxəssis Ruslan Quliyev "Bakı-Xəbər"ə açıqlamasında qeyd etdi ki, bu gözlənilən idi: "Biz illərdir Azərbaycanın turizm marşrutu siyahısına daxil olmasına çalışırdıq. Strateji planımızın əsas hissəsi Azərbaycanın turizm potensialının təqdimatı və ölkəmizi yeni turizm məkanı kimi xarici turistlərə tanıtmaq idi. Təbii ki, növbəti müddət ərzində də bu proses ardıcıl olaraq davam etdiriləcək. "Strateji Yol Xəritəsi"nin müddəalarında göstərilir ki, "Baku brendi" yaradılmalıdır. Və eyni zamanda İpək Yolu və digər layihələr çərçivəsində Azərbaycan tanıdılmalıdır. Əsas hədəf 2025-ci ilə qədər Azərbaycanın turizm məkanı kimi şöhrətini artırmaq və sonrakı illərdə isə dünyada ilk iyirmiliyə daxil olmaqdır. Artıq dünyanın aparıcı nəşrləri Azərbaycanı turizm marşrutları siyahısına daxil edibsə, bu istiqamətdə görülən işləri artırmaq lazımdır. Hesab edirəm ki, ölkəmizdə keçirilən beynəlxalq forumlar və digər əhəmiyyətli tədbirlər çərçivəsində dəvət olunan rəsmilər və media maqnatlarının Azərbaycana gəlməsi onların mətbuatının gündəmini dəyişir. Azərbaycanın şöhrətinin dünyaya yayılmasında "Formula 1"in önəmi böyükdür. Digər beynəlxalq nüfuzlü idman yarışlarının da Azərbaycanın turizm potensialının artırılmasında rolu olub".
Günel CƏLİLOVA
