Bahadur Bilalov: "Kənd turizmi ilə bağlı standartların müəyyənləşdirilməsinin həm bu sektorun inkişafına, həm də kəndlinin təminatına fayda verəcəyi şübhəsizdir"
Son dövrdə Azərbaycanda müxtəlif turizm istiqamətləri üzrə infrastrukturun yaradılması xarici turistlərin respublikamıza marağını artırır. Ölkəmizdə turizmin əksər növlərinin, o cümlədən kənd, müalicə-sağlamlıq, ekoloji, mədəni, sosial, kommersiya, idman, dini, xüsusi maraq kəsb edən və s. inkişafı üçün geniş imkanlar mövcuddur.
Dünya turizm sənayesində kənd turizmi mühüm yer tutur. Xüsusilə böyük meqapolislərin əhalisi üçün şəhərin səs-küyündən uzaqda, sakit yaşıl guşədə istirahət etmək çox cəlbedicidir.
Ölkəmizin iri sənaye mərkəzlərindən və xaricdən gələn insanlar da adi kənd evində yaşayıb istirahət etmək istəyir.
Azərbaycanın bir çox bölgələrində kənd evləri turistlər üçün icarəyə verilir. Düzdür, həmin evlərdə oteldə olan şərait yoxdur. Ancaq o evlərdə istirahət edib dincələnlərin sayı az deyil.
Artıq kənd-yaşıl turizmi ilə məşğul olmaq istəyən ailə- kəndli təsərrüfatları sertifikasiyadan keçməli olacaq.
Milli Məclisdən mətbuata verilən məlumata görə, bu, yeni hazırlanan "Turizm haqqında" qanun layihəsində nəzərdə tutulub. Layihəyə görə, kənd-yaşıl turizmi ilə məşğul olmaq istəyən ailə-kəndli təsərrüfatının ən azı bir üzvü turizm sahəsi üzrə sertifikasiyadan keçməlidir.
Sertifikasiya "Ailə-kəndli təsərrüfatları haqqında" qanunun tələbləri əsasında həyata keçiriləcək.
Təsərrüfat subyektləri bunun üçün nəzarət orqanına yazılı müraciət etməlidir. Bildiriş daxil olduqdan sonra nəzarət orqanı ailə-kəndli təsərrüfatının kənd-yaşıl turizmi ilə məşğul olmaq imkanlarını yoxlayacaq.
Xatırladaq ki, kənd-yaşıl turizmi kənd ərazilərində turistlərin yerləşdirilməsi, qidalanması, nəqliyyatı, istirahəti, eləcə də kənd ərazilərinin zəngin təbii, tarixi və mədəni dəyərləri barədə məlumatlandırma xidmətlərinin göstərilməsi ilə müşayiət olunan turizm növüdür.
Məsələ ilə bağlı fikir bildirən turizm sahəsi üzrə ekspert Bahadur Bilalov bildirdi ki, bu sahədə sertifikatlaşdırma həyata keçirilsə, kəndlilər turist cəlb etməyə daha maraqlı olacaq. Onlar çalışacaq ki, turistə daha yaxşı
xidmət göstərsin: "Nəzərə almaq lazımdır ki, Azərbaycanda istirahət bölgələrinin və turizm zonalarının əksəriyyəti rayonlardadır. Kənd turizmi ilə bağlı standartların müəyyənləşdirilməsinin həm bu sektorun inkişafına, həm də kəndlinin təminatına fayda verəcəyi şübhəsizdir".
Həmsöhbətimizin sözlərinə görə, kənd turizminə əsasən xarici turistlər üstünlük verir: "Həmin turistlər daha çox günlük ev kirayəsinə üstünlük verir. Çünki ev sahibi turisti təbii yolla öz bağçasında yetişdirdiyi məhsullarla təmin edir. Bu da, təbii ki, istənilən turistə xoş təsir bağışlayır. Ümumiyyətlə, kəndlinin gündəlik həyatı xarici turistlər üçün maraqlıdır. Bu sahədə sertifikat tətbiq olunursa, kəndlilər daha çox turist cəlb etməyə çalışacaq. Kəndli öz həyətində daha çox meyvə ağacları əkməyə çalışacaq ki, bu, turistin xoşuna gəlsin".
Həmsöhbətimiz hesab edir ki, kənd turizmi sertifikatlaşdırılarsa, bu, ölkə turizminə müsbət təsir edər.
Günel CƏLİLOVA
