İlqar Hüseynli: "Azərbaycanda metrobus sistemi tətbiq olunsaydı, bu daha uğurlu nəticəyə gətirib çıxara bilərdi"
Paytaxtda nəqliyyatın hərəkətinin intensiv olması üçün mütəmadi olaraq addımlar atılır. Növbəti belə layihə Bakı Nəqliyyat Agentliyi tərəfindən irəli sürülüb. Sözügedən qurum paytaxtın küçə və prospektlərində sərnişin avtobusları üçün xüsusi hərəkət zolaqları təşkil edəcək.
Belə ki, avtobuslar üçün xüsusi hərəkət zolaqları nəzərdə tutulub. Artıq xüsusi zolaqların təşkil ediləcəyi küçə və prospektlər də məlumdur. Yaxın gələcəkdə xüsusi hərəkət zolaqlarının tətbiq ediləcəyi küçə və prospektlərin sayının artırılacağı gözlənir.
Bakıda avtobuslar üçün ayrıca hərəkət zolaqlarının təşkil edilməsində məqsəd müntəzəm sərnişindaşımada təhlükəsizliyin və rahatlığın təmin edilməsi, yollarda sıxlığın azaldılması, o cümlədən əhalinin ictimai nəqliyyatdan istifadəsinin stimullaşdırılmasıdır.
Bakı Nəqliyyat Agentliyinin sektor müdiri Mais Ağayev mətbuata açıqlamasında bildirib ki, bu işlərin aprel ayına qədər yekunlaşacağı gözlənir. İlkin mərhələdə intensivliyin yüksək olduğu 9 prospekt və küçə müəyyən edilib.
Xüsusi hərəkət zolaqlarında yalnız avtobusların hərəkət etməsinə ciddi nəzarət ediləcək, qaydanı pozanlara qarşı sərt tədbirlər görüləcək. Bakı Nəqliyyat Agentliyinin ümumi istifadədə olan nəqliyyat vasitələri üçün xüsusi hərəkət zolaqlarının təşkil edilməsi barədə təklifi Nazirlər Kabinetinin Yol Hərəkəti Təhlükəsizliyi Komissiyası tərəfindən məqbul hesab edilib.
Bütövlükdə, sözügedən layihənin tətbiqi bu sahədə hansı problemlərin həllinə gətirib çıxaracaq?
Məsələyə münasibət bildirən ekspert İlqar Hüseynlinin fikrincə, bu sistemin tətbiqi nəqliyyatda bir sıra problemlərin həllinə öz təsirini göstərə bilər: "Avtobuslar üçün ayrıca zolaqların seçilməsi o halda mümkündür ki, həmin yollarda bunun üçün infrastruktur imkanları olsun. "Azadlıq" prospektində avtobuslar üçün ayrıca zolaqların tətbiq edilməsinə nail olmaq olar. Çünki sözügedən prospektin imkanları buna müəyyən qədər şərait yaradır. Ümumilikdə, avtobuslar üçün ayrıca zolaqların olması sərnişinlərin rahatlığına, eyni zamanda, vaxtında mənzil başına çatmasına xidmət edir. Ancaq Bakı şəhərinin yol infrastrukturu elə vəziyyətdədir ki, bunu bütün prospektlərə tətbiq etmək mümkün deyil. Elə prospektlər var ki, orada yol hərəkətinin eni kifayət qədər deyil. Qonşu Türkiyədə belə problemləri aradan qaldırmaq üçün metrobuslar tətbiq olunur. Metrobuslar üçün ayrıca yol var və onlar qapalı yollarla hərəkət edir. Həmin metrobuslara digər nəqliyyat vasitələrinin daxilolma imkanları məhduddur. Yəni ora yalnız təcili tibbi yardım, yanğınsöndürən və polis maşınlarının girişinə icazə verilir. Hesab edirəm ki, Azərbaycanda da bu sistem tətbiq olunsaydı, bu daha uğurlu nəticəyə gətirib çıxara bilərdi. Təəssüf ki, Bakıda yol infrastrukturu qurularkən bunlar nəzərə alınmayıb". Vidadi ORDAHALLI
